35:562  Or  le  second  est  que  quand  Dieu  retire  sa  main  qu'il  avoit  appesantie  sur  nous,  voyla  un  signe  pour  monstrer  qu'il  nous  est  propice,  et  qu'il  ne  nous  veut  plus  imputer  nos  pechez.  Vray  est  que  quelque  fois  Dieu,  apres  avoir  afflige  les  meschans  et  reprouvez,  les  laissera  la,  et  ils  s'esgayeront  plus  que  devant  comme  desia  nous  avons  dit:  mais  yci  Ezechias  monstre  comme  nous  devons  sentir  la  bonte  de  Dieu  quand  il  nous  donne  quelque  relasche,  quand  il  nous  releve  de  quelque  maladie,  qu'il  nous  delivre  de  quelque  danger,  qu'il  nous  soulage  en  povrete,  et  quand  nous  avons  eu  quelque  trouble  ou  moleste,  il  nous  en  retire.  Si  donc  nous  sommes  faschez  et  contristez,  ce  n'est  pas  assez  de  sentir  le  mal,  mais  il  nous  faut  regarder  le  principal  et  venir  comme  a  la  source.  Un  petit  enfant  quand  il  criera,  si  tost  qu'on  luy  baillera  la  mamelle,  le  voyla  appaise.  Et  pourquoy?  Il  succe:  le  voyla  content:  car  il  n'a  point  d'apprehension  pour  aller  plus  outre  qu'a  la  faim,  il  ne  scait  mesme  dont  procede  la  viande,  il  n'en  scait  nul  gre  a  celle  qui  luy  donne  sa  substance:  car  il  n'ha  ne  sens  ni  raison.  Mais  un  homme  qui  sera  desia  en  aage  de  discretion,  quand  il  verra  son  pere  courrouce  contre  luy,  lequel  luy  dira,  va  vilein,  sors  de  ma  maison:  il  est  certain  que  ce  regret  le  presse  plus  au  vif  d'estre  ainsi  reiette  de  son  pere,  que  d'endurer  la  faim  et  la  soif,  et  toutes  les  povretez  qu'il  est  possible  de  penser.  Or  si  le  pere  puis  apres  luy  pardonne  a  la  requeste  de  quelques  amis,  ou  bien  qu'il  soit  induit  a  cela  voyant  son  fils  estre  desplaisant  de  l'avoir  offense,  et  qu'il  luy  dise,  Retourne,  disne:  si  l'enfant  ha  quelque  raison,  il  ne  se  souciera  pas  tant  de  disner,  que  d'estre  retourne  en  la  grace  et  en  l'amour  de  son  pere,  tellement  qu'il  aimeroit  mieux  iusner,  et  endurer  faim  et  soif,  que  de  donner  iamais  occasion  a  son  pere  de  le  reietter  ainsi:  et  est  plus  aise  beaucoup  de  ce  que  son  pere  luy  a  ainsi  pardonne,  que  de  boire  et  de  manger  son  soul.  Appliquons  maintenant  ceci  a  nostre  usage.  La  plus  part  sont  comme  petis  enfans:  si  Dieu  est  tantost  appaise  envers  eux,  et  qu'il  retire  sa  main,  tellement  qu'ils  n'ayent  plus  occasion  de  se  contrister  au  dehors,  alors  ils  s'esiouiront,  et  loue  soit  Dieu,  diront-ils,  qui  m'a  retire  de  ceste  maladie:  mais  en  disant,  loue  soit  Dieu,  ils  ne  pensent  nullement  a  luy,  ils  n'entrent  point  en  cognoissance  de  leurs  pechez,  et  ne  regardent  pas  la  cause  pourquoy  Dieu  les  avoit  affligez:  ils  ne  cognoissent  pas  aussi  quand  ils  sont  soulagez,  que  c'est  d'autant  qu'il  les  aime  et  leur  est  favorable.  Et  neantmoins  voyla  ou  se  devoit  addresser  toute  leur  ioye,  et  non  pas  de  dire,  Me  voyci  dehait.  Celuy  qui  aura  este  en  quelque  danger,  s'il  s'en  voit  delivre,  le  voyla  a  son  aise  de  n'estre  plus  en  ce  torment  ou  il  estoit:  36