35:561  561  SUR  LE  CANTIQUE  D'EZECHIAS.  562  frappe  sur  nous,  si  est-ce  que  nous  ne  pouvons  pas  venir  a  la  cause  comme  nous  devenons:  et  cela  est  en  partie  d'autant  que  chacun  se  flatte  en  ses  vices,  et  en  partie  aussi  pource  que  nous  n'entrons  point  en  iugement  ou  en  examen  de  nostre  vie,  pour  scavoir  si  elle  est  bien  reglee:  car  il  nous  fasche  d'estre  tormentez  de  nostre  bon  gre,  et  si  faut-il  neantmoins  venir  la:  car  c'est  le  vray  signe  de  repentance,  quand  les  hommes  d'eux-mesmes  sondent  leurs  pechez,  et  qu'ils  n'attendent  pas  que  Dieu  les  y  force  :  mais  qu'ils  se  presentent  a  luy,  et  qu'ils  s'adiournent,  qu'il  ne  leur  faut  point  ne  sergent  ni  officier,  mais  qu'ils  s'examinent  pour  dire,  Helas!  comment  est-ce  que  i'ay  vescu?  comment  en  suis  ie  avec  Dieu?  Quand  donc  les  hommes  de  leur  bon  gre  entrent  en  telle  cognoissance,  en  cela  ils  declarent  que  Dieu  les  a  touchez  par  son  sainct  Esprit:  mais  c'est  une  chose  bien  rare,  comme  i'ay  dit:  car  d'un  coste  l'hypocrisie  nous  empesche  que  nous  n'examinions  point  nos  vices,  et  qu'on  ne  les  descouvre:  nous  voulons  tousiours  fuir  ceste  honte-la,  et  mesmes  nous  cachons  le  mal,  voire  nous  disons  le  mal  estre  bien,  et  nous  faisons  a  croire  que  nous  n'avons  point  offense  Dieu,  ou  bien  nous  amoindrissons  nos  fautes  comme  si  ce  n'estoit  rien,  et  s'il  ne  faloit  sinon  torcher  nostre  bouche.  Voyla  donc  comme  nous  sommes  transportez  par  l'orgueil  et  l'ambition  qui  est  enracinee  en  nostre  nature,  quand  nous  ne  venons  point  droitement  a  Dieu  en  cognoissant  quels  nous  sommes.  Et  puis  d'autre  coste,  il  y  a  que  nous  voudrions  fuir  toute  tristesse,  comme  naturellement  c'est  une  chose  fascheuse.  Or  il  n'y  a  tristesse  si  grande,  que  quand  nous  pensons  que  Dieu  est  nostre  Iuge,  et  que  nous  sommes  malfaiteurs  devant  luy,  car  la  nous  sentons  ce  qui  a  este  dit  par  ci  devant,  qu'il  brise  nos  os  comme  un  lion:  c'est  une  chose  si  terrible  que  l'ire  de  Dieu  qu'il  ne  se  faut  point  esbahir  si  nous  la  fuyons.  Et  c'est  un  vice  toutesfois,  car  il  ne  nous  faut  pas  ressembler  a  ceux  qui  sont  tellement  eslourdis,  qu'ils  ne  veulent  nullement  penser  a  ce  qu'ils  ont  merite  envers  Dieu,  c'est  ascavoir  aux  chastimens  dont  ils  sont  dignes.  Pour  ceste  cause  tant  plus  nous  faut-il  noter  ceste  doctrine,  la  ou  Ezechias  nous  rameine  par  son  exemple  a  cognoistre  nos  pechez,  toutes  fois  et  quantes  nostre  Seigneur  nous  traitte  rudement,  que  non  seulement  nous  scachions  que  c'est  sa  main  qui  nous  afflige,  mais  qu'aussi  il  nous  fait  alors  nostre  proces,  et  qu'il  nous  redargue  des  offenses  que  nous  avons  commises,  et  d'autant  que  nous  n'avons  pas  voulu  venir  de  nostre  bon  gre  passer  condamnation  devant  luy,  et  luy  demander  pardon,  qu'il  faut  qu'il  nous  y  attire  par  force.  Voyla  le  premier  que  nous  avons  a  retenir  de  ce  passage.  Calvini  opera.  Vol.  XXXV.