8:56  arrogant,  eius  scandali,  quod  nonnullos  impedire  poterat,  superandi  rationem  simul  ostendit.  Quid  Alexander  faber  aerarius?  quum  ex  nobili  Christi  discipulo  transfuga  et  deinde  infestissimus  hostis  factus  esset,  annon  aliis  in  exemplum  proponitur  (2  Tim.  4,  14)?  Quid  Demas?  quum  hoc  saeculum  amplexus  turpiter  evangelium  deseruit,  an  reliquos  in  eundem  secum  labyrinthum  debuit  trahere  (ibid.  v.  10)?  Quum  alibi  se  Paulus  ab  omnibus  destitutum  fuisse  commemorat,  an  aliis  evangelii  prodendi  concedit  licentiam  (ibid.  v.  ll)?  Quum  se  a  Phygelo,  Hermogene  Asiaticisque  omnibus  conqueritur  fuisse  reiectum,  an  aliis  tam  sceleratae  discessionis  fenestram  aperit  (ibid.  1,  15)?  Quin  potius  talibus  documentis  expergefiunt  pii  omnes,  ne  obnoxia  sit  Satanae  insidiis  eorum  securitas.  Perpetuum  illud  divinae  electionis  signum  loco  clypei  sic  contra  omnes  insultus  iubentur  opponere,  ut  fidem  quoque  bona  conscientia  obsignent.  Quoniam  mihi  cum  iis  hominibus  est  negotium,  qui  Christiani  censeri  volunt,  ne  sermo  hac  de  re  longius  sit  protrahendus,  duas  Pauli  ad  Timotheum  epistolas  legant,  quae  sedandis,  ut  arbitror,  eorum  animis  abunde  sufficient,  nisi  forte  data  opera  vel  secum  tumultuari  appetunt,  vel  sponte  inanes  a  Christo  deficiendi  captant  praetextus.  Et  certe  apud  sanos  et  prudentes  hoc  unum  sustinendae  fidei  par  erit,  perperam  fieri,  si  aeternam  Dei  veritatem  fluxa  hominum  inconstantia  metimur.  Sed  qui  tam  ingeniosi  sunt  ad  captandam  ex  malis  exemplis  peccandi  veniam,  cur  non  tot  mirifica  invictae  constantiae  documenta  observant,  quae  inter  quasvis  tentationum  procellas  fidem  merito  stabilire  possent?  [pag.  71]  Vidit  haec  nostra  aetas  bonam  martyrum  copiam  alacriter  et  intrepide  ad  mortem  pergere.  Nec  virorum  modo  fuit  haec  gloria  :  sed  in  muliebri  quoque  sexu  plus  quam  virile  robur  Deus  ostendit.  Nullas  certe  cordatas  mulieres  celebrant  veteres  historiae,  quibus  non  respondeant,  quas  a  decem  annis  protulit  Flandria  et  Artesii  comitatus.  Ergone  perfida  quorundam  desertio  fidem  nostram  evertet?  Sacer  ille  sanguis,  cuius  singulae  guttae  totidem  piis  cordibus  sunt  sigilla,  evanescet  sine  pretio  et  virtute?  Quod  si  illis  tam  vilis  est,  non  erit  tamen  apud  Deum  inglorius.  Nec  vero  impune  illis  cedet,  sponte  se  miseris  Christi  desertoribus  addidisse  ruinae  comites:  eos  vero  neglexisse,  qui  porrecta  manu  ad  coelum  nos  vocant.  Venio  ad  obstaculum  illud,  quod  nostro  tempore  multos  a  propiore  Christi  accessu  prohibuit.  Nam  primarios  renascentis  evangelii  doctores  non  modo  contrariis  opinionibus  inter  se  dissidere,  sed  acriter  etiam  confligere  viderunt.  Hic  animos  subiit  dubitatio,  quantum  fidei  habendum  foret  inter  primordia  dissentientibus.  Metus  etiam  subiit,  ne  temere  prosilirent,  unde  pedem  referre  non  liceret.