52:56  Ex  quibus  etiam.  Ex  coniunctione,  quam  habemus  cum  Christo,  probat  nostram  politiam  in  coelis  esse.  Neque  enim  membra  a  suo  capite  divisa  esse  convenit.  Itaque  quum  in  coelo  sit  Christus,  ut  illi  adhaereamus,  extra  mundum  animis  nos  habitare  necesse  est.  Deinde  ubi  thesaurus  noster,  ibi  et  cor  nostrum.  Christus  beatitudo  et  gloria  nostra  in  coelis  est:  sursum  ergo  animae  nostrae  cum  ipso  habitent.  Ideo  nominatim  vocat  salvatorem.  Unde  nobis  salus?  nempe  adveniet  nobis  e  coelo  Christus  salvator:  absurdum  igitur,  nos  in  terra  occupari.  Epithetum  hoc  salvatoris  servit  loci  circumstantiae.  Nam  ideo  dicimur  in  coelo  esse  animis,  quia  inde  solum  nobis  spes  salutis  affulgeat.  Christi  adventus  sicuti  impiis  erit  terribilis,  ita  eorum  animos  potius  avertit  e  coelo  quam  illuc  incitet.  Iudicem  enim  sibi  venturum  sciunt,  et  quantum  in  se  est,  fugiunt.  Ex  his  Pauli  verbis  suavissimam  consolationem  colligunt  piae  animae,  quod  audiunt  expetendum  sibi  esse  adventum  Christi,  quia  futurus  sit  salutaris.  Contra  vero  certum  incredulitatis  signum  est,  ad  quamvis  eius  mentionem  expavescere.  Yide  octavum  caput  ad  Romanos.  Caeterum  dum  vanis  desideriis  alii  circumferuntur,  Paulus  fideles  uno  Christo  vult  esse  contentos.  Praeterea  discimus  ex  hoc  loco,  nihil  humile  aut  terrenum  de  Christo  imaginandum  esse:  quia  suspicere  nos  in  coelum  iubet  Paulus  ut  eum  quaeramus.  Qui  autem  subtiliter  disputant,  non  inclusum  esse  Christum,  aut  abstrusum  in  aliquo  coeli  angulo,  ut  inde  probent,  ubique  esse  eius  corpus,  coelumque  et  terram  implere:  neque  nihil  dicunt,  neque  totum.  Nam  sicuti  temerarium  ac  stultum  foret,  ultra  coelos  conscendere,  et  stationem  in  hac  vel  illa  regione,  aut  sedile,  aut  ambulationem  assignare  Christo:  ita  etiam  carnali  ulla  cogitatione  ipsum  e  coelo  detrahere  ut  in  terra  quaeramus,  stultum  ac  perniciosum  est  deliramentum.  Ergo  sursum  corda,  ut  sint  cum  Domino.  21.  Qui  transformabit.  Hoc  argumento  magis  etiamnum  Philippenses  exstimulat,  ut  animis  in  coelum  sublatis  Christo  penitus  adhaereant:  quia  scilicet  corpus  hoc,  quod  gestamus,  non  perpetuum  est  domicilium,  sed  caducum  tabernaculum,  quod  mox  in  nihilum  redigetur.  Deinde  tot  miseriis  obnoxium  est,  tot  pudendis  infirmitatibus  subiectum,  ut  merito  abiectum  et  ignominiae  plenum  vocari  queat.  Unde  autem  eius  restitutio  speranda?  ex  coelo,  in  Christi  adventu.  Ergo  nulla  pars  est  nostri  quae  non  in  coelum  toto  desiderio  adspirare  debeat.  Praesentem  corporum  nostrorum  humilitatem  cernimus  quum  in  vita,  tum  praecipue  ia  morte:  gloria,  quam  habebunt  conformem  Christi  corpori,  incomprehensibilis  est.  Nam  si  exiguum  gustum,  quem  praebebat  in  transfiguratione,  non  ferebant  discipuli  :  quis  nostrum  plenitudinem  assequatur?  Contenti  nunc  simus  testimonio  nostrae