49:56  tamen  omissa  cura,  se  Dei  sententiae  concessum!��.  Proxima  particula  exegesim  continet.  Illi  enim  os  obstruitur,  qui  sic  irretitus  tenetur  iudicio  ne  qua  elabi  possit.  Alioqui  silere  a  facie  Domini  eat  tremefieri  eius  maiestate,  et  .quasi  eius  fulgore  attonitum  obmutescere  *).  20.  Quia  ex  operibus  legis.  Opera  legis  quae  dicantur,  ambigitur  etiam  inter  eruditos,  dum  alii  ad  universae  legis  observationem  extendunt,  alii  restringunt  ad  solas  caeremonias.  Chrysostomum,  Origenem  et  Hieronymum,  ut  in  priorem  opinionem  concederent,  movit  adiectum  legis  vocabulum.  Nam  in  ea  adiectione  putarunt  esse  peculiarem  connotationem,  ne  de  quibuslibet  operibus  intelligeretur  sermo.  Atqui  facillima  est  huius  scrupi  solutio.  Nam  quia  opera  eatenus  sunt  iusta  coram  Domino,  quatenus  illi  cultum  atque  obedientiam  reddere  per  ea  studemus:  quo  expressius  detraheret  vim  iustificandi  operibus  universis,  ea  nominavit  opera  quae  maxime  possint  iustificare,  si  qua  sint.  Lex  enim  est  quae  habet  promissiones,  citra  quas  nullum  esset  operum  nostrorum  pretium  coram  Deo.  Vides  igitur  qua  ratione  legis  opera  expresserit  Paulus  :  quia  scilicet  per  legem  operibus  pretium  statuitur.  Neque  vero  id  Scholasticos  etiam  latuit:  quibus  satis  tritum  ac  vulgare  est,  opera  non  intrinseca  dignitate,  sed  ex  pacto  meritoria  esse.  Quamquam  autem  falluntur  quia  non  vident  vitiis  semper  inquinata  esse  opera,  quae  meritum  illis  detrahunt,  verum  tamen  est  illud  principium,  ex  voluntaria  legis  promissione  pendere  operum  mercedem.  Prudenter  ergo  et  recte  Paulus  non  de  operibus  nudis  disputat:  sed  diserte  ac  nominatim  legis  observantiam  in  medium  adducit,  de  qua  proprie  quaestio  erat.  Quae  autem  in  eius  sententiae  patrocinium  ab  aliis  doctis  afferuntur,  dilutiora  sunt  quam  oportebat.  Circumcisionis  mentione,  propositum  esse  exemplum  iudicant,  quod  ad  solas  caeremonias  pertineat.  Sed  cur  Paulus  circumcisionem  nominarit,  iam  exposuimus.  Neque  enim  alii  operum  fiducia  turgent  quam  hypocritae.  Scimus  autem  eos  externis  modo  larvis  gloriari.  Deinde  circumcisio,  illorum  opinione,  quaedam  in  legis  iustitiam  initiatio  erat.  Simul  ergo  videbatur  opus  primariae  dignitatis:  imo  quasi  iustitiae  operum  fundamentum.  Quod  autem  ex  Epistola  ad  Galatas  pugnant:  ubi,  quum  Paulus  eandem  tractat  causam,  stilum  tamen  ad  solas  caeremonias  dirigit:  id  quoque  non  satis  firmum  est  ad  obtinendum  quod  volunt.  Certum  est,  Paulo  cum  iis  fuisse  controversiam  qui  populum  falsa  caeremoniarum  fiducia  inflabant.  Hanc  ut  decidat,  non  intra  caeremonias  se  continet,  nec  disputat  specialiter  quid  illae  valeant  :  sed  universam  legem  complectitur:  qualiter  ex  locis  apparet,  qui  omnes  derivantur  ex  illo  fonte.  *)  consternari.