47:56  Nicodemus  pythagoricam  palingenesiam  somniaret,  Christus  ut  hunc  illi  errorem  eximeret,  interpretationis  vice  addidit,  non  fieri  naturaliter  ut  secundo  nascantur  homines,  nec  opus  esse  ut  alterum  corpus  induant,  sed  nasci,  quum  mente  et  animo  renovantur  per  spiritus  gratiam.  Ideo  spiritum  et  aquam  pro  eodem  posuit,  neque  hoc  durum  aut  coactum  videri  debet.  Frequens  ac  tritus  loquendi  mos  est  in  scriptura,  quum  de  spiritu  fit  mentio,  ad  exprimendam  eius  vim  aquae  vel  Ignis  nomen  adiungi.  Iam  aliquoties  habuimus,  Christum  esse  qui  baptizat  spiritu  sancto  et  igni,  ubi  ignis  nihil  a  spiritu  diversum  sonat,  sed  tantum  qualis  eius  in  nobis  sit  efficacia  ostendit.  Quod  autem  hic  praeponit  nomen  aquae,  non  multum  ad  rem  interest:  imo  haec  loquutio  melius  fluit  quam  altera,  quia  scilicet  metaphoram  sequitur  nuda  et  aperta  sententia:  ac  si  diceret  Christus,  neminem  esse  Dei  filium,  donec  per  aquam  renovatus  fuerit,  hanc  vero  aquam  esse  spiritum  qui  nos  repurgat,  et  qui  virtute  sua  in  nos  diffusa  vigorem  inspirat  coelestis  vitae,  quum  natura  prorsus  aridi  simus.  Et  merito  Christus  ut  Nicodemo  suam  inscitiam  exprobret,  formam  loquendi  scripturae  usitatam  adducit.  Debuit  enim  agnoscere  tandem  Nicodemus,  quod  a  Christo  dictum  erat  ex  communi  prophetarum  doctrina  esse  sumptum.  Ergo  aqua  nihil  aliud  est  quam  interior  spiritus  sancti  purgatio  et  vegetatio.  Adde  quod  non  est  insolens  copulam  exegetice  sumi,  quum  scilicet  posterius  membrum  explicatio  est  prioris.  Ac  mihi  etiam  contextus  suffragatur:  nam  quum  mox  rationem  Christus  subiicit,  cur  nos  renasci  oporteat,  praeterita  aquae  mentione  solo  spiritu  quam  exigit  vitae  novitatem  constare  docet,  unde  sequitur  aquam  non  esse  a  spiritu  separandam.  6.  Quod  natum  est  ex  carne.  Probat  a  contrariis  clausum  nobis  omnibus  esse  regnum  Dei,  nisi  per  palingenesiam  ingressus  nobis  patefiat.  Sumit  enim  illud  pro  confesso,  non  posse  nos  ingredi  in  regnum  Dei,  nisi  spirituales  simus.  Atqui  ex  utero  nihil  afferimus  nisi  carnalem  naturam.  Sequitur  ergo  nos  omnes  naturaliter  exsulare  a  regno  Dei,  et  coelesti  vita  privatos  manere  sub  mortis  servitute.  Porro  quum  Christus  hic  ratiocinetur,  renasci  oportere  homines  quia  tantum  caro  sunt,  totum  procul  dubio  hominem  sub  carne  comprehendit.  Caro  itaque  non  corpus  hoc  loco  significat,  sed  animam  simul  adeoque  singulas  eius  partes.  Nam  insulse  papistae  theologastri  ad  partem  quam  vocant  sensualem  restringunt,  quia  hoc  modo  ineptum  esset  Christi  argumentum,  secunda  nativitate  opus  esse,  quia  pars  nostri  vitiosa  sit.  Quod  si  caro  spiritui  opponitur  tanquam  corruptum  integro,  perversum  recto,  pollutum  sancto,  inquinatum  sincero,  inde  colligere  promptum  est,  totam  hominis  naturam  uno  verbo  damnari.  Mentem  ergo  nostram