40:56  nos  versatus  est  sub  persona  medici,  et  occultavit  hic  suam  impietatem  quoad  potuit:  ubi  autem  vidit  se  detectum,  transfugit  in  Poloniam,  et  infecit  totam  illam  regionem  suo  veneno.  Est  indignus  qui  nominetur,  sed  quia  voluit  acquirere  nomen  suis  blasphemiis,  sit  sane  famosus  ut  appetit.  Quoniam  hic  error  latius  nunc  vagatur,  et  tota  Polonia  infecta  est,  ut  iam  dixi,  hoc  diabolico  delirio:  ideo  qui  minus  exercitati  sunt  in  scriptura,  munire  se  debent,  ne  incidant  in  illos  laqueos.  Fingunt  igitur  illi  Christum  sic  esse  Deum,  ut  tamen  non  sit  ille  Deus  quem  celebrant  Moses  et  prophetae.  Ac  proinde  quoties  fit  Dei  mentio  in  lege  et  prophetis,  restringunt  hoc  ad  solum  patrem,  Christum  autem  fatentur  esse  deum:  sed  ubi  propius  urgentur,  dicunt  illum  esse  deum  essentiatum,  cui  pater  communicavit  suam  essentiam  quasi  per  transfusionem:  ita  secundum  ipsos  Christus  est  deus  factitius,  quia  non  est  idem  deus  cum  patre.  Putant  suam  impietatem  stabiliri,  quoties  pater  vocatur  simpliciter  Deus.  Sed  solutio  facilis  est,  tunc  comparationem  fieri  patris  cum  filio:  ita  Deus  dilexit  mundum,  ut  filium  suum  unigenitum  daret.  Pater  quidem  vocatur  illic  Deus,  verum  est,  sed  additur  filius  ex  opposito.  Ergo  non  mirum  est  si  principium  deitatis  locatur  in  supremo  gradu.  Interea  ubi  non  fit  comparatio  unius  personae  cum  altera,  tunc  tota  deitas,  quae  communis  est  patri,  et  filio,  et  spiritui  sancto,  et  una  est  ac  simplex,  notatur.  Denique  ubi  personae  non  veniunt  in  rationem,  nulla  est  relatio  unius  ad  alteram:  ubi  autem  agitur  de  personis,  tunc  nascitur  illa  nota  relationis:  unde  fit  ut  pater  seorsum  ponatur,  deinde  filius  suo  ordine,  et  spiritus  sanctus.  Non  congeram  omnia  scripturae  testimonia,  quia  satis  est  quasi  digito  monstrasse  tam  foedos  errores,  ne  qui  adhuc  minus  periti  sunt  capiantur  talibus  insidiis.  Quum  Paulus  dicit  Deum  fuisse  manifestatum  in  carne,  certe  illic  non  loquitur  de  secunda  quadam  essentia  vel  adventitia.  Una  est  enim  essentia  Dei.  Ergo  tota  deitas  manifestata  fuit  in  carne:  sed  ideo  dicit  Deum  fuisse  manifestatum  in  carne,  sicuti  dicit  etiam  Christus,  Ego  in  patre,  et  pater  in  me  est.  Et  alibi  quum  docet  totam  plenitudinem  deitatis  residere  in  Christo,  hinc  colligimus  non  debere  essentiam  Dei  lacerari  ac  si  pars  una  esset  penes  Christum,  altera  vero  penes  eius  patrem.  Ita  quum  Ioannes  dicit  in  sua  canonica  (5,  20)  Christum  esse  verum  Deum,  Hic  est  verus  Deus  et  vita  aeterna,  inquit:  certe  blasphemia  erit  non  tolerabilis,  si  dicamus  verum  Deum  alium  esse  a  patre.  De  quo  enim  hoc  poterit  praedicari,  nisi  de  unico  Deo?  Iam  si  transfertur  hoc  a  patre,  desinet  esse  Deus.  Si  ergo  Christus  est  verus  Deus,  sequitur  non  aliam  esse  eius  essentiam,  quam  patris.  Ita  quum  Paulus  dicit  ecclesiam  esse  redemptam  Dei  sanguine,  certe  illic  nomen  Dei