31:56  Et  certe  quamvis  inter  saevos  curarum  fluctus  aestuaverit,  illos  tamen  fide  sedatos  fuisse  certum  est,  ut  ipse  quantumvis  anxius  in  Deo  quiesceret.  Ita  pii  semper  ab  omni  metu  emergunt  victores,  sicuti  impios,  qui  in  Deum  non  recumbunt,  etiam  in  minimis  periculis  obruit  desperatio.  Quidam  temporis  enallagen  esse  putant,  ideoque  in  tempore  futuro  reddunt,  Iacobo  et  dormiam  :  quia  mox  futuri  temporis  verbum  subiicitur,  Dominus  sustentabit  me.  Sed  quia  continuum  actum  hic  designat,  .in  tribus  primis  verbis  necesse  esse  non  putavi  mutare  tempus.  Sciendum  tamen  est,  securitatem  hanc  non  referri  proprie  ad  tempus  afflictionis,  vel  saltem  non  restringi:  potius  enim,  meo  iudicio,  quantum  bonum  ex  fide  et  precibus  adeptus  fuerit,  David  commemorat,  nempe  pacem  et  tranquillum  animi  bene  compositi  statum.  Hoc  metaphorice  significat,  se  ordinariis  vitae  actionibus  secure  perfunctum  esse,  dicens  :  Ego,  inquit,  in  lecto  non  iacui  pervigil  et  inquietus,  sed  placide  dormivi,  quum  anxiis  et  trepidis  non  contingat  talis  dormitio.  Sed  notemus,  Davidem  Dei  praesidio,  non  autem  suo  stupore  fuisse  ita  securum.  Nam  impios  quoque  sopitos  tenet  mentis  ebrietas,  dum  se  foedus  cum  morte  pepigisse  somniant.  At  secus  David,  qui  nisi  Dei  virtute  suffultus  et  ope  protectus,  quietem  non  habuit.  Proximo  versu  inaestimabilem  vim  eius  fiduciae  amplificat,  quam  ex  Dei  protectione  concipiunt  pii  omnes.  Nam  ut  immensa  est  Dei  potentia,  ita  statuunt  invictam  fore  contra  quoslibet  impetus,  furores,  apparatus,  et  copias  totius  mundi.  Et  sane  nisi  hunc  tribuimus  Deo  honorem,  subinde  concident  nobis  animi.  Quare  in  periculis  discamus  non  metiri  humano  modo  Dei  auxilium:  sed  quidquid  obiectum  fuerit  terroris,  ideo  despicere,  quia  frivolum  est  quidquid  adversus  Deum  moliuntur  homines.  8.  Surge  Domine,  serva  me  Deus  mi:  quia  percussisti  omnes  inimicos  meos  in  maxilla,  dentes  impiorum  confregisti:  9.  Domino  est  salus,  super  populum  tuum  benedictio  tua.  Selah.  8.  (Surge  Domine).  Quia  proximis  versibus  gloriatus  est  David  de  pacato  statu,  videri  posset  nunc  a  Domino  petere  ut  tota  vita  incolumis  maneat  :  ao  si  dixisset,  Domine  quando  abs  te  prostrati  sunt  hostes  mei,  hanc  gratiam  in  finem  usque  prosequere,  et  continua.  Sed  quia  novum  non  est  ut  David  in  Psalmis  permisceat  varios  affectus,  magis  probabile  videtur,  postquam  fiduciae  suae  mentionem  inseruit,  ad  easdem  iterum  preces  redire.  Servari  igitur  petit,  quia  erat  in  praesenti  discrimine.  Quod  sequitur  de  hostibus  percussis,  bifariam  exponi  potest:  vel  ut  precando  in  memoriam  revocet  superiores  victorias,  vel  ut  Dei  auxilium  expertus  et