30:56  tandum  est,  ac  prout  quisque  vel  ingenio,  vel  consilio  et  prudentia,  vel  viribus,  vel  audacia  excelluerit,  cavendum,  ne  vana  et  inani  gloria  efferatur:  et  ne  quid  temere  nisi  prius  invocato  Dei  nomine  suscipiat:  ac  licet  viribus  polleat,  intra  modestiae  tamen  terminos  se  contineat,  ut  ne  latum  quidem  pedem  abeat,  digitumve  moveat,  nisi  prius  de  Dei  voluntate  certior  factus,  cuius  unius  auspiciis  regatur.  Denique  discunto  omnes  sese  ita  continere  in  officio  ut  nihil  ausint,  nihil  aggrediantur,  quod  non  ipse  prius  iusserit.  Exemplo  esto  Saul  hic  deliberans  de  persequendis  hostibus,  populo  consentiente,  et  se  ad  hostes  insequendos  comparante.  Sed  quem  sacerdos  cohibuit  et  revocavit,  Deique  voluntatem  interrogare  et  explorare  iussit.  Porro,  ut  ante  diximus,  speciale  fuit  illis  temporibus  privilegium  populo  concessum,  ut  rebus  dubiis  et  incertis  Dei  voluntas  per  ephod  exploraretur,  et  Dominus  quid  factum  vellet  interrogaretur.  Sacerdos  enim  sacram  illam  tunicam,  quae  ephod  dicta  est  induebatur  ad  Deum  accessurus:  et  se  ad  arcam  sistebat,  unde  Deus  responsum  dabat,  et  quid  factum  vellet  significabat.  Ex  illo,  inquam,  more  et  ritu  sacerdos  Saulem  ab  instituto  revocat  Deumque  interrogare  iubet:  ut  si  Deus  persequendos  hostes  declararit,  toti  in  illum  recumbant,  Deumque  sibi  persuadeant  prosperum  exitum  daturum,  quod  nihil  nisi  ipsius  ductu  susceperint,  eiusque  voluntatem  inquisiverint.  Sane  fateor  nostram  hodie  dissimilem  esse  conditionem  :  neque  enim  peculiares  de  rebus  singulis  revelationes  nobis  Deus  dat:  quod  tamen  molestum  nobis  esse  non  debeat:  siquidem  vel  unicum  verbum  sufficere  debet  quo  Dei  voluntatem  docemur  in  evangelio  filii  sui,  quandoquidem  longe  praestantius  illud  est  quam  reliquae  omnes  revelationes  quascunque  tandem  expetierimus.  Nam  etsi  prophetias  non  habeamus  quales  fuerunt  sub  lege,  tamen  aliquid  amplius  habemus,  nimirum  perfectionem  illam  doctrinae  in  qua  acquiescendum  nobis  est.  Etsi  enim  non  contingit  iam  in  rebus  nostris  angustis  id  assequi  quod  populus  israeliticus  obtinuerat,  ut  Domini  voluntatem  interrogaret,  et  Deus  quid  facto  esset  opus  revelaret:  tamen  quod  longe  est  pretiosius  obtinemus,  nempe  factam  nobis  promissionem,  Deum  se  in  integritate  et  sinceritate  quaerentibus  consilium  daturum,  et  in  omnibus  viis  directurum  :  modo  ad  ipsum  ex  ipsius  verbi  praescripto  confugiant.  Observandum  enim  Israelitas  non  habuisse  tam  perspicuam,  neque  tam  amplam  et  perfectam  instructionem  quam  habemus  hodie.  Nam  Samuelis  tempore  nihil  nisi  lex  Domini  scriptis  erat  traditum.  Nos  vero  libros  prophetarum,  librosque  historicos,  quibus  prioris  illius  ecclesiae  regimen  et  institutio  docetur,  tandemque  scripta  evangelica,  quibus  divinarum  promissionum  impletio  continetur  habemus.  Quare  nobis  ista  satisfacere  satis  copiose