28:56  souffrir.  Or  ce  que  Moyse  adiouste  monstre  ce  qui  fut  hier  aussi  bien  touche:  c'est  assavoir  que  Dieu  n'a  pas  tousiours  puni  les  transgressions  selon  qu'il  le  pouvoit  faire  :  ie  di  puni  quant  a  la  Loy  qu'il  a  donnee  pour  la  police  d'Israel.  Car  il  a  endure  beaucoup  de  choses  pour  la  durte  de  ce  peuple:  comme  nostre  Seigneur  Iesus  leur  monstre,  en  parlant  des  divorces  qui  se  faisoyent  contre  raison  et  equite.  Car  il  est  dit  ici  :  Que  si  un  homme  trouve  une  fille,  et  que  sans  qu'il  la  force  qu'elle  se  laisse  seduire,  qu'il  sera  quitte  en  donnant  argent  pour  le  mariage  de  la  fille  :  et  puis  la  prenant  a  femme,  et  n'ayant  point  la  liberte  commune  de  la  pouvoir  iamais  laisser.  Or  il  est  vray  que  cela  estoit  comme  un  chastiment  pour  l'homme  qui  avoit  paillarde:  mais  qu'il  y  eust  une  rigueur  telle  comme  le  cas  merite,  nenni.  Que  dirons-nous  donc?  Est-ce  que  Dieu  ait  voulu  permettre  les  paillardises,  ou  qu'il  ait  mis  la  bride  sur  le  col,  ou  bien  qu'il  ait  voulu  declarer  que  le  peche  soit  tout  pardonne?  Rien  de  tout  cela.  Car  nous  avons  monstre  ci  dessus,  quand  Dieu  a  donne  sa  Loy  qui  consiste  en  dix  parolles,  il  a  declare  la  sa  volonte,  il  a  donne  reigle  certaine  aux  hommes  comme  ils  ont  a  vivre.  Or  ceste  loy-la  est  celle  qui  nous  iugera  au  dernier  iour,  voire  et  non  seulement  pour  condamner  a  punition  temporelle  ceux  qui  auront  failli:  mais  nous  savons  qu'il  nous  en  faut  respondre  devant  le  siege  iudicial  de  Dieu,  pour  perir  a  iamais.  Quand  donc  nous  serons  eschappez  de  la  main  des  hommes,  et  mesmes  que  Dieu  aura  dissimule  sur  nos  pechez:  si  est-ce  qu'il  nous  faudra  en  la  fin  venir  a  conte  devant  luy.  Voila  donc  la  Loy  de  Dieu  qui  est  pour  nous  iuger.  Or  ceci  n'estoit  que  pour  la  police  terrestre.  Et  Dieu  (comme  nous  avons  dit)  n'a  point  la  regarde  a  une  perfection  telle  comme  elle  seroit  requise  entre  les  fideles:  mais  plustost  il  a  supporte  la  durte  de  ce  peuple,  qui  estoit  rude  et  difficile  a  gouverner:  et  quand  il  n'a  point  puni  les  divorces  qui  se  faisoyent  contre  equite,  ce  n'est  point  pourtant  qu'il  les  eust  permis.  Car  nous  oyons  ce  que  nostre  Seigneur  Iesus  Christ  en  prononce,  que  l'homme  qui  aura  delaisse  sa  femme  (excepte  le  cas  d'adultere,  et  qu'il  soit  prouve  contre  elle  qu'elle  ait  paillarde)  et  qu'il  en  ait  prins  une  autre  :  que  c'est  un  paillard.  Et  qui  prend  une  femme  delaissee,  qu'il  paillarde  aussi  bien:  que  le  mariage  est  desloyal,  et  que  Dieu  le  deteste.  Autant  en  est-il  de  ce  que  nous  voyons  en  ce  passage.  Car  combien  que  Dieu  ne  punisse  point  celuy  qui  aura  paillarde  avec  une  ieune  fille,  voire  en  rigueur  extreme:  ce  n'est  pas  pourtant  que  la  paillardise  soit  a  pardonner  en  facon  que  ce  soit.  Si  elle  n'est  punie  devant  les  hommes:  et  bien  Dieu  se  reserve-tousiours  son  droict.  Or  ceci  se  fait,  d'autant  que  pour  la  police