2:56  [CO  2.56]  dierum.  Hinc  et  illud  emanat  quod  Samaritanae  mulieri  dicebat  Christus,  gentem  eius  et  reliquos  omnes  populos  adorare  quod  nescirent;  solos  Iudaeos  Deo  vero  cultum  exhibere  (Ioann.  4,  22).  Nam  quum  humana  mens  pro  sua  imbecillitate  pervenire  ad  Deum  nullo  modo  queat  nisi  sacro  eius  verbo  adiuta  et  sublevata,  omnes  tunc  mortales,  exceptis  Iudaeis,  quia  Deum  sine  verbo  quaerebant,  necesse  fuit  in  vanitate  atque  errore  versari.  CAPUT  VII.  Quo  testimonio  scripturam  oporteat  sanciri,  nempe  spiritus:  ut  certa  constet  eius  autoritas;  atque  impium  esse  commentum,  fidem  eius  pendere  ab  ecclesiae  iudicio.  [Inst  1.7.1.]  Verum  antequam  longius  progrediar,  quaedam  inserere  operae  pretium  est  de  scripturae  autoritate,  quae  non  modo  animos  praeparent  ad  eius  reverentiam,  sed  omnem  dubitationem  eximant.  Porro  ubi  sermonem  Dei  esse  qui  proponitur,  in  confesso  est,  nemo  est  tam  deploratae  audaciae,  nisi  forte  et  sensu  communi  et  humanitate  quoque  ipsa  destitutus,  qui  fidem  loquenti  derogare  ausit.  Sed  quoniam  non  quotidiana  e  coelis  redduntur  oracula,  et  scripturae  solae  exstant  quibus  visum  est  Domino  suam  perpetuae  memoriae  veritatem  consecrare:  non  alio  iure  plenam  apud  fideles  autoritatem  obtinent,  quam  ubi  statuunt  e  coelo  fluxisse,  ac  si  vivae  ipsae  Dei  voces  illic  exaudirentur.  Res  sane  dignissima  quae  et  tractetur  fusius,  et  accuratius  expendatur.  Sed  dabunt  veniam  lectores,  si  magis  respiciam  quid  ferat  operis  instituti  ratio,  quam  quid  huius  rei  amplitudo  requirat.  Invaluit  autem  apud  plerosque  perniciosissimus  error,  scripturae  tantum  inesse  momenti  quantum  illi  ecclesiae  suffragiis  conceditur:  ac  si  vero  aeterna  inviolabilisque  Dei  veritas  hominum  arbitrio  niteretur.  Sic  enim  magno  cum  ludibrio  spiritus  sancti  quaerunt:  ecquis  nobis  fidem  faciat,  haec  a  Deo  prodiisse?  ecquis  salva  et  intacta  ad  nostram  usque  aetatem  pervenisse,  certiores  reddat?  ecquis  persuadeat,  librum  hunc  reverenter  excipiendum,  alterum  numero  expungendum,  nisi  certam  istorum  omnium  regulam  ecclesia  praescriberet?  Pendet  igitur,  inquiunt,  ab  ecclesiae  determinatione,  et  quae  scripturae  reverentia  debeatur,  et  qui  libri  in  eius  catalogo  censendi  sint.  Ita  sacrilegi  homines,  dum  sub  ecclesiae  praetextu  volunt  effraenatam  tyrannidem  invehere,  nihil  curant