1:56  [CO  1.  56]  DE  FIDE,  UBI  ET  SYMBOLUM,  QUOD  APOSTOLICUM  VOCANT,  EXPLICATUR  CAP.  II. [p. 102]  Iam  satis  ex  proxima  disputatione  intelligi  potest,  quae  nobis  per  legem  agenda  Dominus  praescribat,  quorum  si  qua  in  parte  lapsi  fuerimus,  iram  et  terribile  mortis  aeternae  iudicium  edicit;  rursum,  quam  non  modo  arduum,  sed  prorsus  supra  vires,  extraque  omnem  nostram  facultatem  sit,  legem  implere  ut  exigit.  Quare  si  nos  duntaxat  ipsos  intuemur,  quidque  nobis  dignum  sit  cogitamus,  nihil  est  bonae  spei  reliquum,  sed  a  Deo  abiectos  mors  et  certissima  confusio  nos  manet.  Id  etiam  explicatum  fuit,  unam  esse  effugiendae  huius  calamitatis  rationem,  quaeque  nos  in  melius  restituat,  nempe  Domini  misericordiam,  quam  certissime  experiemur,  si  eam  solida  fide  accipiemus,  inque  ea  secure  acquiescemus.  Hoc  nunc  superest,  qualis  esse  haec  fides  debeat:  id  quod  ex  symbolo,  quod  Apostolicum  vocant,  facile  discemus,  quo  breviter  compendium [p. 103]  collectum  est,  et  quasi  epitome  quaedam  fidei  in  quam  consentit  ecclesia  catholica.  Verum  antequam  ultra  progredimur,  admonendi  sumus,  duas  esse  fidei  formas.  Altera  est:  si  quis  credat  Deum  esse,  [OS  69]  historiam  quae  de  Christo  narratur  veram  esse  arbitretur;  quale  est  nobis  iudicium  de  iis,  quae  vel  olim  gesta  narrantur,  vel  ipsi  praesentes  spectavimus.  Haec  vero  ut  nullius  est  momenti,  ita  indigna  est  fidei  appellatione;  de  qua  si  quis  gloriatur,  intelligat  eam  se  habere  cum  diabolis  communem  (Iac.  2),  quibus  tamen  nihil  inde  accedit,  nisi  quod  magis  terrentur,  tremunt,  et  consternantur.  Altera  est:  qua  non  modo  Deum  et  Christum  esse  credimus,  sed  etiam  in  Deum  credimus,  et  Christum,  vere  ipsum  pro  Deo  nostro  ac  Christum  pro  salvatore  agnoscentes.  Hoc  vero  est,  non  modo  verum  reputare  id  omne,  quod  de  Deo  ac  Christo  vel  scriptum  est,  vel  dicitur,  sed  spem  omnem  ac  fiduciam  in  uno  Deo  ac  Christo  reponere,  hacque  cogitatione  sic  offirmatos  esse,  ut  de  bona  Dei  erga  nos  voluntate  nihil  dubitemus;  ut  certo  persuasi  simus  quidquid  nobis  necesse  est,  tum  in  animae,  tum  in  corporis  usus,  ab  eo  nobis  datum  iri;  ut  certo  expectemus  praestiturum  quidquid  de  eo  scripturae  pollicentur;  ut  nihil  haesitemus, [p. 104]  quin  nobis  Christus  sit  Iesus,  hoc  est,  salvator;  quin,  ut  per  ipsum  peccatorum  remissionem  ac  sanctificationem  obtinemus  ita  salus  quoque  data  sit;  ut  tandem  perducamur  in  regnum  Dei,  quod  ultimo  die  revelabitur.  Atque  hoc  quidem  caput  est  et  fere  summa  eorum  omnium,  quae  sacro  suo  verbo  nobis  offert  ac