9:558  addicta,  donec  in  iustitiae  obsequium  reformentur?  nos  denique  Satanae  esse  mancipia,  donec  filius  Dei  a  misera  illa  tyrannide  nos  liberet?  An  nihili  est  curiositas,  quaerere  quomodo  tranquillae  animae  in  solida  salutis  fiducia  quiescant?  An  subtilis  est  quaestio  de  legitima  Dei  invocatione  disserere?  An  obscura  sunt  aenigmata,  praecipere  quomodo  rite  colatur  Deus  ex  legis  suae  praescripto,  an  hominum  figmentis?  An  certamen  est  de  re  nihili,  dum  baptismum  purgare  nitimur  foedis  et  pudendis  sordibus:  sacram  vero  coenam,  quae  prorsus  abolita  fuit,  postliminio  restituere,  ac  rursus  profligare  detestabile  missae  sacrilegium,  [pag.  138]  quod  innumeris  impietatum  monstris  scatet?  Non  recenseo  singulas  species,  quia  pauca  haec  attingere  sufficiat:  quibus  monstratis  lectores  tuam  impudentiam  palpent.  Observatu  digna  est  Irenaei  sententia,  melius  esse  non  tenere  cuiuslibet  rei  causam,  nec  aliud  quaerere  ad  scientiam  nisi  Iesum  Christum,  quam  per  quaestionum  subtilitates  et  multiloquium  in  impietatem  cadere.  Huic  quoque  recte  suffragatur  Hilarius,  in  simplicitate  esse  fidem,  in  fide  iustitiam  :  nec  Deum  nos  ad  beatam  vitam  per  difficiles  quaestiones  vocare.  In  expedito  et  facili  nobis  esse  aeternitatem,  si  Iesum  [pag  139]  Christum  credimus  suscitatum  a  mortuis,  et  ipsum  esse  Dominum  confitemur.  Sed  uterque  sic  praefatus,  an  non  qua  potest  vehementia  errores  exagitat?  Quos  labyrinthos  cogitur  Irenaeus  discutere,  ut  fidei  puritatem  a  prodigiosis  fallaciis  vindicet?  Quam  anxie  in  diluendis  Arianorum  cavillis  laborat  Hilarius?  Quum  his  certaminibus  se  exercent,  dicemusne  eius  sobrietatis  fuisse  oblitos  quam  paulo  ante  commendaverant?  Imo  ita  maxime  sobrii  reperiuntur,  dum  nihil  imminui  sustinent  ex  doctrina  verbo  Dei  patefacta.  Videtur  quidem  exemplum  quod  [pag.  140]  producit  censor,  colore  rationis  non  carere,  dum  in  tractanda  praedestinatione  moderationem  exigit.  Et  certe  sedulo  cavendum  est,  ne  perplexis  et  spinosis  quaestionibus  nos  implicemus.  Sed  aliud  homini  maledico  consilium  fuisse  ex  clausula  liquet.  Quamvis  enim  invidiam  declinet,  ubi  fatetur  nonnullas  esse  quaestiones  quae  a  curiosis  et  inquietis  hominibus  excitatae  etiam  doctis  et  piis  hominibus  negotium  faciunt,  quia  eos  quibus  studium  fuit  gratuitam  Dei  electionem  asserere  oblique  carpit,  doctrinam  simul  ipsam  quae  fontem  salutis  nostrae  ostendit,  et  quae  piae  sanctaeque  humilitatis  unicum  est  fundamentum,  indigne  [pag.  141]  suis  calumniis  deformans,  furtim  labefactare  nititur.  Fateor  sane  arcanum  Dei  iudicium,  quo  alios  ad  salutem,  alios  ad  interitum  praedestinavit,  semper  impiorum  blasphemiis  fuisse  expositum:  et  hoc  doctrinae  caput  fuisse  non  superfluis  modo,  sed  noxiis  quaestionibus  perperam  distractum:  dum  profani  homines  in  profundas  abyssos  caeca  temeritate  penetrare  non  dubitant.  Frae-