48:558  37.  Universae  animae.  Primum  ideo  refertur  hominum  numerus,  quo  certius  constet  neminem  in  turba  periisse.  Non  enim  recenset  Lucas  quot  homines  ad  litus  enatarint,  sed  quot  tunc  fuerint  in  navi.  Deinde  ut  illustrius  reddatur  miraculum.  Humanitus  enim  accidere  vix  potuit,  ut  ducenti  septuaginta  sex  ex  naufragio  in  terram  evaderent  ad  unum  omnes.  Nam  praeter  nautas  paucos  nandi  peritos  fuisse  probabile  est.  Tametsi  autem  sumpto  cibo  paululum  refectae  erant  vires:  diuturno  tamen  taedio  et  moerore  sic  confecti  erant,  ut  mirum  fuerit  movendis  brachiis  agiles  fuisse.  Iam  vero  reputandum  est  quantopere  sint  tumultuati:  quum  vix  contingat  viginti  aut  triginta  homines  BIC  natare  in  periculo,  quin  alii  alios  collidant  vel  obruant.  Manum  ergo  suam  palam  exseruit  Deus,  quum  sine  exceptione  numerati  sunt  omnes  in  litore,  qui  se  in  mare  proiecerant.  38,  Satiati  cibo.  Haec  circumstantia  ostendit  commotos  demum  fuisse  Pauli  sermone.  Nondum  illuxerat,  ut  scire  possent  essetne  vicinus  aliquis  portus.  Quod  tamen  reliquum  est  tritici  proiiciunt  in  mare,  allevandae  navis  causa.  Hoc  non  erant  facturi,  nisi  plus  apud  eos  quam  antea  valuisset  Pauli  autoritas.  Verum  ut  instabiles  sunt  increduli  omnes,  facile  mox  evanuit  ex  eorum  animis  illa  persuasio.  41.  Impegerunt  navem.  Tunc  vero  et  Paulum  lusisse  Deus  videri  potuit,  et  ipse  nugando,  socios  naufragii  vana  spe  lactasse.  Sed  Deus  prosperiore  successu  errorem  mox  discussit.  Ita  scilicet  ubi  fracta  et  soluta  est  navis,  frangi  et  liquescere  oportuit  omnium  animos,  ut  desperatio  miraculi  gloriam  augeret.  Sic  enim  opera  sua  moderari  solet  Deus,  ut  multis  se  obstaculis  ingerentibus  speciem  difficultatis  nobis  praebeat.  Hoc  modo  sensus  nostros  ad  maiorem  intentionem  acuit,  ut  tandem  discamus,  quamvis  toto  mundo  luctante,  minime  impediri  quominus  victor  emergat.  Haec  ratio  est  cur  maluerit  Paulum  et  alios  fracta  navi  naufragos  trahere  quam  navem  integram  perducere  ad  litus.  42.  Porro  militum.  Nimis  saeva  ingratitudo  fuit,  quum  vitam  bis  aut  ter  Paulo  deberent  milites,  eum  occidere  cogitant,  in  cuius  gratiam  aequum  fuisset  aliis  parcere.  Allata  illis  per  ipsum  fuerat  salus  non  secus  ac  per  angelum  Dei:  salutare  ex  ore  eius  consilium  audierant:  exanimes  eodem  die  recreaverat.  Nunc  crudeliter  perdere  non  dubitant,  a  quo  toties  et  tot  modis  fuerant  liberati.  Quare  si  contingat  iniquam  nobis  mercedem  referri  pro  benefactis,  non  est  cur  nos  turbare  debeat  hominum  ingratitudo,  quae  plus  quam  vulgaris  est  morbus.  Caeterum,  non  modo  in  Paulum  vitae  suae  ministrum  ingrati  sunt,  sed  foeda  simul  incredulitas  et  divinae  gratiae  oblivio  se  prodit.  Nuper  amplexi  erant  oraculum  illud,  donatas  esse  Paulo  animas: