40:558  Hic  versus  clarius  demonstrat  quod  iam  dixi,  fuisse  tale  somnium  ut  rex  sentiret  Deum  eius  esse  autorem.  Neque  enim  hoc  primum  eius  somnium  fuit,  sed  terror,  quem  Deus  incusserat  eius  animo,  coegit  ipsum  vocare  omnes  magos:  quia  non  potuit  quiescere,  etiam  si  rediisset  ad  somnum  suum.  Sensit  igitur  quasi  cauterium  in  animo  suo,  quia  Dominus  non  passus  est  ipsum  quiescere,  sed  voluit  turbulento  esse  animo,  donec  data  esset  interpretatio  somnii.  Ideo  profani  etiam  scriptores  non  male  somnia  locant  inter  divinationes.  Varie  quidem  loquuntur,  quia  nihil  potest  esse  apud  eos  certum,  vel  solidum:  tamen  haec  persuasio  infixa  fuit  eorum  animis,  fieri  non  posse  quin  esset  aliqua  divinatio  in  somniis.  Hoc  extendere  ad  somnia  quaelibet  stultum  esset  ac  puerile,  quemadmodum  videmus  quosdam  nullum  somnium  praetermittere  absque  coniectura,  et  ita  se  faciunt  ridiculos:  quia  scimus  ex  diversis  causis  somnia  oriri,  nempe  ex  diurnis  cogitationibus:  si  quid  meditatus  fuero  interdiu,  nocte  mihi  occurret  aliquod  insomnium,  quia  scilicet  animus  non  ita  obruitur  sopore,  quin  retineat  semper  aliquod  intelligentiae  semen,  licet  sit  suffocatum.  Et  experientia  hoc  satis  docet,  recurrere  diurnas  cogitationes  in  ipso  somno.  Deinde  varii  affectus  animi  vel  corporis  pariunt  etiam  multa  somuia.  Si  quis  tristitiam  secum  in  lectum  afferat  vel  ex  morte  amici,  vel  ex  aliquo  damno,  vel  ex  iniuria  sibi  illata,  vel  ex  rebus  adversis  quibuslibet,  somnia  etiam  concipiet,  sicuti  feret  illa  praeparatio  animi.  Corpus  etiam  ipsum  somnia  generat,  quemadmodum  videmus  eos  qui  febre  laborant  nunc  fontes  imaginari  si  eos  urgeat  sitis,  nunc  incendia,  nunc  multas  imaginationes  concipere.  Videmus  etiam  ut  intemperantia  homines  conturbet  in  ipso  somno.  Temulenti  enim  homines  rapiuntur  quasi  in  phrenetidem  somniando.  Apparent  igitur  multae  naturales  causae,  quantum  ad  somnia  ipsa  pertinent.  Ergo  velle  quaerere  divinationem  vel  certam  rationem  in  omnibus,  hoc  esset  nimis  insipidum.  Sed  ex  diversa  parte  satis  constat  quaedam  somnia  non  caruisse  divinatione.  Omitto  quae  narrantur  ex  veteribus  historiis:  sed  certe  somnium  Calphurniae  uxoris  Iulii  Caesaris  non  potuit  esse  fictitium,  quia  antequam  occideretur,  vulgatum  fuit.  Occisus  fuit  Caesar,  quemadmodum  illa  somniaverat.  Idem  etiam  dici  potest  de  medico  Augusti,  qui  iusserat  eum  exire  e  tabernaculo  suo,  quo  die  pugnatum  fuit  in  Pharsalia,  et  tamen  nulla  fuit  ratio  cur  medicus  iuberet  lectica  ipsum  efferri  extra  tentorium,  nisi  quia  somniaverat  ita  necesse  esse.  Quae  fuit  illa  necessitas?  nempe  quae  non  potuit  coniici  humanitus.  Nam  capta  fuerunt  castra  Augusti  eo  ipso  momento.  Non  dubito  quin  multa  sint  fabulosa:  sed  ego  hic  habeo  delectum,  et  nondum  attingo  somnia,  quorum  mentio  fit  in  verbo