5:557  ACTES  DE  RATISBONNE.  qu'en  l'Eglise  latine,  la  langue  latine  doit  estre  tenue,  et  qu'il  suffit,  que  souvent  le  peuple  soit  clairement  et  soigneusement  enseigne  des  choses  qui  se  font  a  la  Messe:  et  admoneste,  que  a  toutes  actions  il  donne  son  consentement:  priant  Dieu  par  un  devot  desir,  qu'iceluy  preste  l'aureille  de  sa  benignite  aux  oraisons  publiques  de  l'Eglise:  moyennant  toutesfoys,  que  ce  qui  est  recite  pour  l'Epistre  et  Evangile,  soit  explique  en  langue  entendue.  Ilz  craignent  aussi,  que  si  ces  souverains  mysteres  sont  mis  en  avant  et  chantez  souvent  en  la  langue  vulgaire  du  pays,  devant  toute  la  multitude  du  peuple  (selon  la  forme  de  l'Eglise  presente)  il  n'advienne  que  par  les  meschans  et  mal  morigerez,  ilz  ne  soyent  tournez  en  mocquerie  et  chanson,  et  que  par  ainsi  on  ne  heurte  en  ce  que  nostre  Seigneur  a  deffendu,  c'est  a  scavoir,  qu'on  ne  donnast  la  chose  saincte  aux  chiens.  Mais  sur  cecy  telle  moderation  pourra  estre  facillement  trouvee  et  instituee  par  gens  scavans  et  craignans  Dieu:  que  il  se  pourra  faire  qu'on  ne  diminuera  rien  a  la  dignite  des  Sacremens.  Et  que  la  droicte  intelligence  des  choses  qui  se  font,  ny  l'Amen,  ne  sera  point  retire  du  peuple  sainct.  Et  puis  que  les  Ceremonies  et  observations  anciennes,  qui  nous  ont  este  donnees  comme  de  main  en  main,  touchant  l'administration  des  Sacremens,  sentent  une  excellente  Religion  et  piete  :  il  fauldra  eslire  de  gens  scavans  et  craignans  Dieu,  qui  regarderont  et  examineront  soingneusement  icelles  Ceremonies  et  maniere  de  faire:  a  celle  fin,  que  si  d'aventure  quelque  chose  a  este  introduicte,  qui  ne  touche  en  rien  la  piete,  que  cela  soit  aboly,  et  que  la  purete  et  integrite  ancienne  soit  restituee  aux  choses  sainctes.  De  la  discipline  Ecclesiastique.  [fol.  55]  II  est  tout  evident,  que  la  discipline  Ecclesiastique  est  tresnecessaire  en  l'Eglise:  pourtant  qu'icelle  seule  retient  nostre  foy  et  esperance  et  est  guide  de  nostre  voyage  salutaire,  conductrice,  maistresse,  entretenement  et  nourrissement  de  vertuz:  laquelle  nous  faict  tousiours  demourer  en  Christ,  et  en  l'unite  et  corps  d'iceluy,  et  vivre  a  tousiours  en  Dieu,  pour  l'utilite  du  prochain,  et  pour  parvenir  es  promesses  celestes  et  loyers  divins:  l'imitation  de  laquelle  est  profitable  et  le  mespris  est  mortel.  Comme  S.  Cyprian  l'enseigne.  C'est  celle  laquelle  l'Apostre  prescript  a.  Timothee  et  a  Tite  Evesques:  a  celle  fin  qu'ilz  entendent  comme  il  fault  converser  en  la  maison  de  Dieu,  qui  est  l'Eglise  de  Dieu,  colomne  et  firmament  de  verite  (1  Tim.  3,  15).  Or  combien  que  icelle  par  la  trop  grande  playe  des  choses  presentes,  ne  peult  estre  reduicte  a  la  severite  des  Canons  anciens.  Il  fault  toutesfoys  tascher  par  tous  moyens  que  a  tout  le  moins  tant  que  faire