40:557  557  IN  DANIELEM.  CAP.  H.  558  periculo  mortis,  quia  erat  ex  numero  magorum.  Quidam,  ut  alibi  attigimus,  annum  secundum  numerant  ab  urbe  capta  et  excisa.  Dicunt  enim  regem  Nebuchadnezer  vocari  ab  eo  tempore,  quo  adeptus  est  monarchiam  pacatam.  Priusquam  exscinderet  urbem  et  templum  una  cum  gente,  nondum  potuit  censeri  monarchia  in  solidum:  ideo  referunt  hoc  ad  tempus  captae  urbis,  quemadmodum  dixi.  Sed  ego  in  alteram  potius  coniecturam  inclino,  ut  est  magis  probabilis,  quod  scilicet  regnaverit  una  cum  patre:  et  exposui,  quum  oppugnavit  Ierosolymam  tempore  Ioachim,  missum  fuisse  a  patre:  deinde  ab  expeditione  aegyptiaca  reversum  fuisse  in  Chaldaeam,  ne  quid  auderet  illic  quispiam  novare:  voluit  occurrere  seditionibus.  In  hoc  igitur  nihil  est  absurdum,  Nebuchadnezer  regnasse  ante  mortem  patris,  quia  iam  accitus  fuerat  in  societatem  imperii  :  deinde  regnasse  solum  :  et  secundo  anno  regni  eius  hoc  contigisse  quod  nunc  narratur.  Nihil  in  hac  expositione  est  coactum:  deinde  historia  consentit.  Ego  igitur  sententiam  hanc  potius  amplector.  Dicit  eum  somniasse  somnia,  et  tamen  unum  duntaxat  somnium  narratur.  Sed  quia  res  multae  erant  implicitae  in  hoc  somnio,  non  mirum  est  si  plurali  numero  utatur.  Iam  additur  spiritum  eius  fuisse  contritum,  nempe  ut  sciamus  somnium  non  fuisse  vulgare.  Neque  enim  tunc  primum  somniare  coepit  Nebuchadnezer:  neque  ita  fuit  exterritus  noctibus  singulis,  ut  accerseret  omnes  magos.  Ergo  in  hoc  somnio  aliquid  fuit  extraordinarium,  quod  voluit  exprimere  Daniel  his  verbis.  Quod  vertunt  communiter  in  fine  versus,  somnum  eius  fuisse  interruptum,  nescio  an  conveniat:  et  expositio  illa  altera,  quam  etiam  frater  noster  D.  Antonius*)  vobis  attulit,  optime  quadrat,  quod  scilicet  fuerit  somnus  eius  super  eum,  hoc  est,  quod  iterum  coeperit  dormire.  Videtur  ergo  mihi  genuinus  et  simplex  esse  sensus  verborum,  quod  scilicet  confusus  fuerit  spiritus  eius:  id  est,  quod  occupaverit  mentem  eius  maximus  terror,  ita  ut  sciret  somnium  illud  divinitus  profectum  esse:  deinde  quod  quasi  attonitus  iterum  dormierit,  .quia  scilicet  erat  similis  homini  mortuo,  ita  ut  quum  agitaret  secum  de  interpretatione  somnii,  tandem  obstupefactus  fuerit:  et  redierit  ad  somnum:  unde  etiam  illa  somnii  oblivio,  quam  postea  videbimus.  Sequitur,  2.  Et  edixit  rex  ut  vocarentur  (nescio  quibus  nominibus  reddam  has  voces  hebraicas:  dicam  tamen  de  re  ipsa:  ut  ergo  vocarentur)  astrologi,  et  coniectores,  et  divini,  et  Chaldaei,  ut  annuntiarent  regi  somnia  sua  (hoc  est,  ut  exponerent  regi  somnia  sua):  et  venerunt  et  steterunt  in  conspectu  regis.  *)  CevalleriuB.