25:557  557  COMMENTARIUS  IN  IOSUE  CAP.  XXIII.  558  pronunciant  totum  populum  fore  testem,  ac  si  dicerent,  re  ipsa  palam  fore  sibi  nunquam  fuisse  in  animo  comminisci  novum  Dei  cultum  :  et  recte  interpretantur  quomodo  altare  fuisset  illicitum,  nempe  si  illic  instituissent  mactare  sua  sacrificia.  Neque  enim  lex  simpliciter  acervos  lapidum  damnavit:  sed  voluit  uno  tantum  in  loco  sacrificia  offerri  ad  retinendum  in  una  fide  populum,  ne  discerperetur  religio,  ne  daretur  licentia  hominum  temeritati,  et  ita  quisque  post  sua  commenta  difflueret.  Ita  videmus  qualitate  facti  monstrata,  detestationem  tolli  quam  decem  tribus  conceperant.  Improprie  quidem,  sed  apte  pro  ruditate  sensus  nostri  Deus  statuitur  supra  omnes  deos.  Neque  enim  aliis  conferri  posset  nisi  plures  essent.  Itaque  fugiendae  absurditatis  causa,  aliqui  de  angelis  exponunt,  quod  tametsi  alicubi  bene  quadrare  fateor,  nego  tamen  esse  perpetuum.  Nec  vero  durum  videri  debet,  eum  qui  unicus  est  ac  solus,  vocari  tamen  Deum  deorum  quia  parem  non  habeat:  sed  emineat  supra  omnem  celsitudinem,  adeoque  sua  gloria  obscuret,  ac  in  nihilum  redigat  omnia  deitatis  nomina,  quae  in  mundo  celebrantur.  Ita  haec  loquutio  referri  debet  ad  communem  vulgi  sensum.  26,,  Et  diximus.  Crassa  quidem  impietas,  cuius  rei  acti  fuerant,  probe  refutata  fuit  :  non  tamen  videntur  omni  ex  parte  fuisse  extra  culpam,  quia  lex  vetat  quaslibet  statuas  erigere  (Exod.  20,  4.  Levit.  26,1.  Deut.  5,  8).  Verum  excusatio  facilis  est,  non  alias  statuas  damnari,  nisi  quae  ad  Deum  repraesentandum  spectant.  Interea  congeriem  lapidum  erigere  trophaei  loco,  vel  in  testimonium  miraculi,  vel  in  memoriam  insignis  Dei  gratiae  nusquam  lex  prohibuit:  alioqui  et  Iosue,  et  post  eum  multi  sancti  iudices  ac  reges  se  profana  novitate  inquinassent.  Verum  nihil  aliud  Deo  displicuit,  nisi  hominum  mentes  deorsum  trahi,  ut  crasso  et  terreno  modo  coleretur.  Satis  ergo  superque  a  noxa  se  eximunt  filii  Ruben,  Gad,  et  Manasse,  dum  profitentur  non  alium  fore  usum  altaris,  quam  ut  vinculum  sit  fraternae  coniunctionis,  et  iustam  rationem  adferunt:  quia  periculum  erat  ne  longo  temporis  progressu  decem  tribus  alias  excluderent  tanquam  alienas,  quod  non  eandem  terram  incolerent.  Nam  quia  regio  trans  Iordanem  non  fuerat  initio  comprehensa  in  foedere,  poterat  diversa  habitatio  movere  litem  dissidii.  Posteris  itaque  suis  tempestive  consulunt,  ut  altari,  quasi  publicis  tabulis,  ius  suum  tueri  queant:  ut  ita  alii  alios  mutuo  agnoscant,  et  communiter  serviant  uni  Deo.  30.  Porro  quum  audisset.  Recte  zelo  suo  temperant  Phinees  et  legati,  dum  morosius  non  insistunt,  nec  urgent  conceptum  praeiudicium,  sed  excusationem  blande  et  libenter  admittunt.  Multos  enim,  si  qua  re  offensi  sint  et  exasperati,  placare  nulla  defensio  potest,  quin  semper  reperiant  quod