9:556  quia  ad  suos  scopulos  attrahere  non  potuerit  quos  magis  delectat  rectae  navigationis  cursus.  Hinc  scilicet  istae  lacrymae,  nisi  valeat  Nicodemitarum  consilium,  non  [pag.  128]  posse  concordiam  et  pacem  coalescere.  Interea  ferendum  non  est,  ut  impurus  calumniator  suis  maledictis  innoxios  Christi  servos  opprimat,  qui  pietatis  iactura  nolunt  pacem  redimere.  De  nostris  adversariis  verissime  praedicat,  quum  pacem  optare  se  fingant,  non  aliam  velle,  nisi  quae  coniuncta  sit  cum  nostro  interitu.  De  nobis  autem  quam  improbe  mentiatur,  testis  est  eius  conscientia.  Tyrannidem  papatus,  quae  non  minus  hominum  saluti  quam  Dei  gloriae  inimica  est,  si  cupimus  deletam,  nihil  mirum,  quando  ea  stante  nec  religio,  nec  Dei  cultus,  nec  Christi  regnum  postliminio  [pag.  129]  in  suum  gradum  restitui  queunt.  Sed  quum  id  agendo  consulamus  eorum  saluti  qui  nobis  crudelissimi  sunt  hostes,  immerito  nobis  exprobratur  quod  ab  omnibus  nostris  studiis  et  actionibus  remotissimum  est,  velle  scilicet  istos  perditos,  nec  aliter  quam  eorum  oppressione  placari  posse.  Facessat  quam  adducit  bellorum  civilium  similitudo.  Neque  enim  cum  aliis  bellum  gerimus,  nisi  qui  pietatem  funditus  evertendo  professi  sunt  ecclesiae  hostes  :  quibus  tamen  ipsis  reconciliari  parati  erimus,  modo  salva  et  intacta  maneat  veritas,  quae  et  Dei  gloriam,  et  ecclesiae  salutem  in  se  continet,  [pag.  130]  Nobis  nihil  quaerimus:  victoriae  laus  ad  Deum  referatur,  fructus  ad  totum  fidelium  corpus.  Sed  pacificandis  dissidiis  insulsa  praescribitur  ratio  a  censore:  ut  cedamus  utrinque,  et  aliquid  remittamus,  ut  neutram  partem  suae  conditionis  poeniteat.  Quasi  vero  nostrum  sit  mediis  pactionibus  de  iure  Dei  transigere.  Ubi  de  agrorum  finibus  inter  se  litigant  homines,  vel  de  dignitate  certant,  vel  de  pecunia  aliisve  terrenis  negotiis  contendunt,  audienda  Christi  admonitio  ut  statim  pacem  quaeramus.  Sed  nostrae  dimicationi  finem  alium  quaerere  fas  non  est,  quam  si  ultro  citroque  ad  [pag.  131]  subeundum  Christi  iugum  manus  demus.  Summum  in  animas  imperium  Deus  uni  sibi  vendicat:  ereptum  est,  restitui  volumus.  Totam  pietatis  summam  verbo  suo  complexus  est,  et  aeternae  salutis  viam  monstravit  :  tota  legis,  prophetarum  et  evangelii  doctrina  perversis  commentis,  imo  prodigiosis  erroribus  ac  deliriis  indigne  corrupta  est:  restitui  suo  nitori  postulamus,  quod  fieri  nequit,  nisi  prorsus  concidant  quae  coelestibus  oraculis  opposita  fuerunt  hominum  commenta.  Templum  Dei,  cuius  inviolabilis  esse  debebat  sanctitas,  foede  profanatum  purgari  cupimus.  Quisnam  hominum  ex  sacrosancto  [pag.  132]  Dei  iure  vel  tantillum  subducere  audeat,  ut  inter  nos  coeamus?  Speciosum  quidem  nomen  est  pacis,  inquit  Hilarius,  *)  et  pulchra  opinio  unitatis:  sed  quis  1)  Contra  Auxentium  et  Arianos