48:556  verbis  exprimitur  fidei  natura,  dum  statuitur  mutua  inter  ipsam  et  Dei  verbum  relatio,  ut  contra  tentationum  insultus  animos  sustentet  Caeterum  non  solum  vectores  suo  exemplo  ad  credendum  hortatur:  sed  quasi  sponsoris  partes  suscipit,  ut  fidem  oraculo  conciliet.  Quod  mox  subiicitur  de  insula,  posterius  signum  est:  unde  post  rei  exitum  clarius  pateat,  non  fuisse  hanc  incertam  navigationem.  Alias  vectorum  nihil  intererat  enatandi  modum  scire.  Videmus  ergo  ut  Deus  quam  pollicitus  est  salutem  insigniat,  ne  fortuita  videri  possit.  Simul  tamen  notandum  est,  Deum  illos  tenere  suspensos:  partim  ut  fidem  servi  sui  exerceat,  partim  ut  omnes  agnoscant  Paulum  a  spiritu  sancto  didicisse  quod  humano  sensu  nondum  comprehendi  poterat.  In  ipso  tamen  contextu  docet  Lucas,  qe  sic  quidem  fuisse  creditum  eius  verbis.  Quod  enim  putabant  nautae  sibi  apparere  aliquam  regionem  mediterraneam,  minime  consentaneum  erat  cum  promissione  de  appulsu  in  insulam.  Videmus  ergo  ut  vix  tandem  experientia  coacti  senserint  verum  dixisse.  30.  Nautis  vero  quaerentibus.  Iam  hac  quoque  in  parte  enituit  in  Paulo  spiritus  sancti  gratia,  quod  prudenter  admonuit  retrahendos  esse  a  fuga  nautas.  Cur  non  enim  centurio  potius,  vel  alius  quispiam  e  turba  fraudem  olfacit,  nisi  ut  Paulus  ad  extremum  usque  liberationis  sit  minister?  Sed  mirum  est  quod  reliquos  vectores  salvos  posse  fieri  negat,  nisi  retentis  nautis.  Quasi  vero  Dei  promissionem  exinanire  penes  ipsos  fuerit.  Respondeo,  Paulum  hic  de  potentia  Dei  praecise  non  disputare,  ut  eam  a  voluntate  et  mediis  seiungat.  Et  certe  non  ideo  fidelibus  virtutem  suam  Deus  commendat,  ut  contemptis  mediis  torpori  et  socordiae  indulgeant,  vel  temere  se  proiiciant  ubi  certa  est  cavendi  ratio.  Deus  Ezechiae  pollicitus  erat  obsessae  urbis  liberationem.  Si  portas  aperuisset  hostibus:  annon  Iesaias  statim  clamasset:  Tu  et  te  et  urbem  perdis?  Neque  tamen  propterea  sequitur,  mediis  vel  adminiculis  alligatam  esse  Dei  manum.  Sed  quum  Deus  hunc  vel  illum  agendi  modum  ordinat,  hominum  sensus  continet,  ne  praescriptas  sibi  metas  transsiliant.  33.  Et  quum  dies  inciperet  apparere,  hortabatur  Paulus  omnes  sumere  cibum,  dicens  :  Dies  hic  decimus  quartus  est,  quod  exspectantes  ieiuni  permanetis,  nihil  accipientes.  34.  Propter  quod  hortor  vos  ut  sumatis  cibum:  hoc  enim  ad  salutem  vestram  pertinet:  quia  nullius  vestrum  capillus  de  capite  cadet.  35.  Et  quum  haec  dixisset,  sumpto  pane  gratias  egit  Deo  in  conspectu  omnium,  et  quum  fregisset  coepit  edere.  36.  Porro  animis  iam  recreati  omnes  sumpserunt  et  ipsi  cibum.  37.  Eramus  vero  universae  animae  in  navi  ducentae  septuaginta  sex.  38.  Et  satiati  cibo  allevabant  navem,  eiicientes  triticum  in  mare.  39.  Quum