40:555  555  PRAELECTIONES  19.  Et  loquutus  est  cum  illis  rex:  et  non  inventus  est  ex  omnibus  sicuti  Daniel,  Hananiah,  Misael,  et  Azariah,  et  steterunt  coram  rege.  20.  m  (in)  omni  verbo,  sapientia  et  intelligentia,  quod  sciscitatus  est  ab  eis  rex,  invenit  eos  decuplo  supra  omnes  genethliacos,  et  astrologos  (id  est,  praestantiores  genethliacis  et  astrologis)  qui  (erant)  in  toto  regno  eius.  Iam  narrat  Daniel  se  et  socios  fuisse  productos  tempore  praefixo:  quoniam  triennium  a  rege  constitutum  erat,  quo  edocerentur  in  omni  scientia  chaldaica.  Producit  igitur  eos  praefectus  eunuchorum.  Dicit  se  et  socios  fuisse  probatos  a  rege,  ita  ut  primas  tenerent  inter  alios  omnes.  Confirmat  his  verbis  quod  iam  dixi,  nempe  Dominum  longo  temporis  successu  illos  ornasse  tali  gratia,  ut  conspicui  essent  in  tota  aula  regis,  et  rex  ipse  agnosceret  in  ipsis  aliquid  non  vulgare.  Oportuit  igitur  tam  regem  quam  omnes  eius  aulicos  induere  opinionem  de  quatuor  istis  adolescentibus,  quae  exprimeret  ab  illis  aliquam  reverentiam.  Iam  tunc  voluit  Deus  illustrare  gloriam  suam,  quia  non  dubium  est  quin  coactus  fuerit  rex  mirari,  qui  fieret  ut  isti  Chaldaeos  omnes  superassent.  Rex  enim  neque  sumptibus  pepercit,  neque  etiam  neglexit  instituere  suos  populares.  Quum  videret  homines  exteros  et  captivos  ita  excellere,  poterat  animum  eius  pungere  aliqua  aemulatio.  Sed  quemadmodum  iam  dixi,  voluit  Deus  hoc  modo  se  ipsum  extollere  in  persona  servorum  suorum,  ut  rex  cogeretur  agnoscere  aliquid  divinum  in  istis  adolescentibus.  Unde  autem  haec  illis  praestantia?  Nam  Chaldaei  iactabant  se  quasi  nasci  sapientes  ex  utero,  aliae  omnes  gentes  erant  illis  barbarae.  Quum  igitur  Iudaei  ita  eminent  supra  omnes,  sequitur  Deum  quem  colunt  eum  esse  qui  distribuit,  prout  vult,  cuique  acumen  et  perspicaciam,  quia  nemo  naturaliter  ingenio  pollet,  nisi  quatenus  hac  gratia  donatus  est  e  coelo.  Necesse  igitur  fuit,  Deum  ita  glorificari,  quum  Daniel  et  socii  eius  longo  intervallo  superarent  omnes  Chaldaeos.  Ita  Deus  solet  hostes  suos  rapere  in  admirationem  suae  virtutis,  etiam  quum  maxime  lucem  fugiunt.  Quid  enim  propositum  erat  regi  Nebuchadnezer,  nisi  ut  Dei  memoriam  exstingueret?  ut  haberet  apud  se  Iudaeos  ex  nobilibus  familiis,  qui  deinde  religionem  ipsam  in  qua  nati  erant  oppugnarent  ?  Voluit  hoc  Nebuchadnezer:  sed  Deus  frustratus  est  tale  consilium  tyranni,  et  fecit  ut  illustrius  redderetur  nomen  suum.  Iam  sequitur,  21.  Et  fuit  Daniel  usque  ad  annum  primum  Cyri  regis.