48:554  satagendo  et  eiulando  fessi,  attonitis  similes  resident,  eos  alloquitur  Paulus.  Ergo  velut  semimortuos  languere  oportuit,  donec  paulisper  sedati  essent,  placide  et  cum  silentio  audirent  probe  monentem.  Videtur  tamen  intempestive  facere  Paulus,  dum  eis  stultitiam  exprobrat,  quia  salvis  rebus  obtemperare  suo  consilio  noluerint,  quem  sciebant  rei  nauticae  imperitum,  ut  ipse  quoque  sibi  conscius  erat  propriae  inscitiae.  Atqui  si  reputamus  quam  aegre  flectantur  homines  et  lormentur  ad  sanam  mentem,  apprime  utilis  fuit  haec  castigatio.  Nulla  erat  Pauli  autoritas  quae  illos  moveret,  nisi  hoc  testatum  illis  foret,  infeliciter  illis  cessisse,  quod  eum  prius  neglexerant.  Crudelis  quidem  est  obiurgatio,  quae  nihil  affert  solatii.  Verum  si  addito  remedio  condiatur,  iam  ipsa  est  pars  medicinae.  Sic  Paulus,  postquam  attentos  reddidit  vectores  et  ab  ipso  eventu  docuit  habendam  sibi  esse  fidem,  ad  bonum  animum  hortatur  et  salutem  promittit.  Hoc  vero  fiduciae  non  vulgaris  signum  est,  quum  dicit  oportuisse  sibi  obtemperari.  Itaque  his  verbis  testatur  nihil  se  temere  attulisse  in  medium;  sed  quod  divinitus  praescriptum  erat,  illis  mandasse.  Nam  etsi  nulla  tune  specialis  revelatio  ei  data  legitur  :  sibi  tamen  arcanae  spiritus  gubernationis  conscius  erat  :  ut  intrepide  monitoris  partes  suscipere  posset,  qui  praeeuntem  habebat  Dei  spiritum.  Unde  melius  patet  quod  nuper  attigi,  Paulum  ita  praefando  expergefacere  vectores,  ut  attentius  audiant  quod  dicturus  est.  Alioqui  ridiculum  fuisset,  hominem  naufragum  eiusdem  calamitatis  sociis  salutem  promittere.  23.  Adstitit  enim  mihi.  Ne  temeritatis  argui  possit,  quod  tam  secure  omnibus  salutem  promittat,  Deum  testem  ac  autorem  adducit.  Nec  vero  dubium  est,  quin  certa  illi  constiterit  visionis  fides,  ut  a  Satanae  praestigiis  nihil  metueret.  Quia  enim  sub  revelationum  specie  saepe  hominibus  illudit  ille  mendacii  pater,  nunquam  servis  suis  apparuit  Deus  vel  per  se  vel  per  angelos,  quin  illustribus  notis  omnem  dubitationis  scrupulum  eximeret:  deinde  spiritu  discretionis  eos  instrueret,  ne  quis  fallaciis  esset  locus.  Caeterum,  diserte  Paulus  nomen  Dei  sui  celebrat  apud  homines  profanos:  non  modo  ut  discant  in  Iudaea  coli  verum  Deum,  sed  etiam  agnoscant  eius  cultorem  Paulum  ipsum  esse.  Sciebant  omnes  cur  coniectus  esset  in  vincula.  Nunc  quum  e  coelo  ad  eum  angeli  descendant,  colligere  promptum  est,  divinitus  probari  ipsius  causam.  Subest  igitur  in  his  verbis  evangelii  commendatio.  Interea  videmus  ut  Paulus  vinculis  triumphet,  dum  tot  hominibus  minister  est  salutis  et  Dei  interpres.  24.  Ne  timeas,  Paule.  Sedulo  huc  incumbit,  ut  uni  Deo  gloriam  liberationis  asserat:  ne  falso  eam  superstitiosi  ad  sua  idola  transferant.  Et  hoo  modo  ad  rectam  fidem  eos  invitat.  Verum  hinc  patet  quanta  sit  hominum  pravitas,  quod  aures  clau-