40:554  designet  simpliciter  artes  liberales,  non  comprehendat  artes  magicas,  quae,  nisi  tunc  vigebant,  postea  floruerunt  apud  Chaldaeos.  Scimus  vero  nihil  fuisse  apud  incredulos  sincerum.  Et  iam  aliqua  ex  parte  admonui,  Danielem  non  fuisse  imbutum  illis  superstitionibus,  quae  tunc  maximo  in  pretio  erant  in  illa  gente.  Corruperant  tunc  astrologiam,  non  contenti  genuina  scientia:  sed  Daniel  et  socii  eius  sic  fuerunt  instituti  apud  Chaldaeos,  ut  non  attingerent  mixturas  illas,  vel  corruptelas  potius,  quae  semper  a  vera  scientia  debent  separari.  Et  absurdum  esset  tribuere  hoc  Deo,  quasi  probaret  artes  magicas  quae,  ut  satis  notum  est,  severe  prohibentur  et  damnantur  ipsius  lege,  Deuteronomii  18.  Quum  ergo  Deus  abominetur  magicas  illas  superstitiones  tanquam  praestigias  diaboli,  non  potest  hoc  quadrare,  Danielem  et  socios  eius  fuisse  divinitus  ornatos  hoc  dono,  quod  scilicet  optime  profecerint  in  omni  literatura  chaldaica.  Restringi  igitur  hoc  debet  ad  veram  et  naturalem  scientiam.  Quantum  ad  Danielem  spectat,  dicit  ipsum  etiam  visiones  et  somnia  intellexisse.  Scimus  autem  ex  duodecimo  capite  Numerorum  duobus  illis  modis  prophetas  intellexisse  quaenam  esset  Dei  voluntas.  Nam  illic  dum  obiurgat  Deus  Aaronem  et  Mariam,  dicit  hoc  esse  quasi  ordinarium,  quoties  manifestare  vult  consilium  suum  prophetis,  ut  per  visiones  et  per  somnia  cum  illis  loquatur:  Mosen  vero  eximi  a  communi  ordine,  quia  facie  ad  faciem,  ore  ad  os  cum  ipso  loquatur.  Deus  ergo  quoties  voluit  prophetis  suis  uti,  vel  per  visiones,  vel  per  somnia  patefecit  illis  quod  volebat  perferri  ad  populum.  Quum  ergo  hic  dicitur,  Danielem  intellexisse  somnia  et  visiones,  tantundem  hoc  valet,  atque  donatum  fuisse  prophetico  spiritu.  Quum  ergo  socii  eius  in  omni  literatura  essent  optimi  doctores  et  magistri,  solus  ipse  propheta  Dei  fuit.  Nunc  tenemus  quorsum  pertineat  hoc  discrimen,  ubi  intelligentia  visionum  et  somniorum  peculiariter  adscribitur  Danieli.  Et  hic  melius  confirmatur  quod  iam  dictum  est,  nempe  iam  tunc  Danielem  fuisse  ornatum  insignibus  Dei,  ut  postea  maiori  cum  fide  posset  suscipere  propheticum  munus,  et  plus  etiam  fidei  adhiberetur  eius  doctrinae.  Potuit  quidem  momento  uno  Deus  ipsum  formare:  deinde  potuit  etiam  incutere  vel  terrorem  vel  reverentiam  omnium  animis,  ut  amplecterentur  eius  doctrinam:  sed  voluit  per  gradus  ita  extollere  servum  suum,  ut  prodiret  opportuno  tempore,  et  non  esset  novitius:  imo  ut  omnes  cognoscerent  iam  a  multis  annis  impressas  fuisse  notas,  quae  eum  discernerent  a  vulgo  vel  communi  ordine.  Postea  sequitur,  18.  Et  a  fine  dierum,  quibus  edixerat  rex  ut  producerentur,  introduxit  eos  princeps  (vel,  praefectus)  eunuchorum  coram  Nebuchadnezer.