35:554  qu'ils  veuillent  despiter  Dieu  manifestement.  Nous  voyons  donc  ceste  inconstance,  et  ce  changement  et  legerete  quasi  en  tous  hommes.  A  l'opposite  Ezechias  dit  yci,  que  ce  n'est  pas  seulement  pour  le  temps  present  qu'il  cognoit  que  Dieu  le  chastie,  mais  que  tant  qu'il  vivra  au  monde  tousiours  il  luy  souviendra  du  chastiment  qu'il  a  receu,  et  ira  comme  d'une  alleure  tremblante.  Car  le  mot  dont  il  use  signifie  quelque  fois  Aller  doucement,  et  quelquefois  il  signifie  Se  remuer.  Or  en  somme,  il  veut  dire  que  iamais  il  n'aura  une  alleure  ferme,  mais  il  sera  tant  debilite,  qu'il  sera  comme  si  on  avoit  retire  un  homme  de  la  fosse:  comme  celuy  qui  aura  este  malade  par  longue  espace  de  temps,  a  grand'  peine  peut  il  trainer  les  ailes:  et  encores  qu'il  se  monstre  par  les  rues,  si  est-ce  qu'on  voit  bien  qu'il  n'en  peut  plus:  et  puis  s'il  est  debout,  il  aura  quasi  tousiours  une  facon  de  chanceler.  Nous  voyons  maintenant  en  somme  qu'a  voulu  dire  le  Roy  Ezechias.  Par  cela  nous  sommes  admonestez  de  ne  trouver  point  estrange  si  Dieu  quelque  fois  nous  afflige  beaucoup  plus  rudement  que  nous  ne  voudrions:  car  nous  n'avons  point  assez  profite  en  ses  verges,  iusques  a  ce  que  nous  soyons  vrayement  humiliez  pour  tout  le  temps  de  nostre  vie.  Qui  est-ce  qui  trouvera  cela  en  soy?  Qu'un  chacun  maintenant  regarde  si  un  mois  apres  que  Dieu  luy  aura  fait  misericorde,  il  a  recognu  ses  fautes,  et  s'il  en  tremble:  mais  au  contraire  (comme  i'ay  desia  dit)  nous  ne  demandons  sinon  d'en  effacer  toute  memoire:  car  il  nous  semble  que  c'est  matiere  de  melancholie.  Puis  qu'ainsi  est  donc  que  nous  mettons  si  facilement  les  verges  de  Dieu  en  oubli,  il  ne  se  faut  point  esbahir  si  apres  nous  avoir  chastiez  une  fois  il  y  retourne  pour  la  seconde,  et  se  monstre  si  rude  que  nous  ne  scachions  que  devenir.  Parquoy  voyci  que  nous  avons  a  faire,  c'est  que  durant  les  corrections,  et  quand  nous  sommes  angoissez,  nous  portions  patiemment  la  rigueur  de  Dieu,  scachons  que  ce  n'est  point  sans  cause  qu'il  use  envers  nous  de  rudesse  si  excessive,  et  que  c'est  d'autant  qu'il  cognoist  que  nous  en  avons  besoin.  Voyla  pour  un  item.  Et  puis  pour  le  second,  que  nous  taschions  a  nous  esveiller  a  cause  de  la  paresse  qui  est  en  nous,  et  que  nous  sommes  si  lasches  et  si  froids  que  c'est  pitie.  Que  donc  nous  pensions  bien  durant  l'affliction  a  toutes  nos  offenses,  pour  en  avoir  un  sentiment  et  une  apprehension  engravee  iusques  au  profond  de  nos  coeurs.  Et  quand  Dieu  nous  a  delivrez,  que  nous  pensions  encores  a  cela,  et  que  le  sentiment  du  mal  ne  soit  point  seulement  pour  un  iour,  ou  pour  une  petite  espace,  mais  comme  nous  desirons  que  Dieu  nous  supporte,  et  qu'il  nous  donne  quelque  loisir  de  benir  son  Nom,  et  de  nous  esiouir  en  luy,  que  nous  facions  tellement