40:553  553  IN  DANIELEM.  CAP.  I.  554  tunc  desistimus:  sed  ubi  lucrum  nobis  est  in  manu,  et  non  metuimus  a  periculo,  iam  nemo  est  qui  non  sponte  illuc  inclinet.  Videmus  ergo  quid  sibi  velit  Daniel  in  hoc  versu,  nempe  quia  Melsar  vidit  hoc  sibi  esse  utile,  et  quia  potuit  facere  quaestum  ex  victu  quem  rex  assignaverat  quatuor  pueris,  ideo  dedit  legumina.  Sed  notandum  est  etiam  consilium  Danielis.  Vult  enim  hic  ostendere,  non  debere  adscribi  hominis  beneficio  quod  potuerit  integrum  se  et  illibatum  servare  una  cum  sociis.  Quare?  Quia  nunquam  hoc  impetrasset  ab  isto  homine  Melsar,  nisi  ubi  vidit  se  hoc  tuto  posse  concedere.  Quoniam  igitur  Melsar  consuluit  proprio  commodo,  et  privatae  utilitati,  deinde  etiam  voluit  effugere  omnia  discrimina  et  omnes  molestias,  hinc  facile  colligimus,  non  posse  hoc  censeri  eius  beneficium,  quod  Daniel  et  socii  adepti  sunt  quod  optabant,  sed  fuisse  rem  totam  gubernatam  Dei  providentia,  sic  ut  homo  mansuesceret.  Interea  autem  Deus  palam  ostendit  sibi  totam  laudem  deberi,  quo  scilicet  ita  exerceret  Danielis  et  sociorum  eius  gratitudinem.  17.  Et  pueris  illis  quatuor,  dedit  (inquam)  illis  Deus  cognitionem  et  scientiam  in  omni  literatura  et  sapientia:  et  Daniel  intellexit  in  omni  visione  et  somniis.  Hic  ostendit  propheta  quod  iam  supra  attigimus,  sibi  partam  fuisse  autoritatem,  ut  maiore  cum  fructu  exerceret  prophetae  officium.  Oportuit  enim  certis  notis  ipsum  insigniri,  ut  Iudaei  primum,  et  extranei  etiam  cognoscerent  ipsum  esse  praeditum  prophetico  spiritu.  Pars  autem  huius  gratiae  collata  fuit  tribus  eius  sociis:  sed  excelluit  supra  omnes,  quia  Deus  aptaverat  illum  ad  singulare  munus.  Hic  finis  notandus  est,  quia  illud  esset  frigidum,  mercedem  illis  fuisse  repensam  a  Deo,  eo  quod  frugaliter  imo  etiam  sordide  victitaverant,  et  abstinuerant  sponte  a  delitiis  aulicis.  Aliud  enim  fuit  Dei  consilium.  Nam  voluit,  quemadmodum  iam  dixi,  extollere  Danielem,  ut  cum  fructu  ostenderet  Deum  Israelis  unicum  esse  Deum:  et  quoniam  volebat  etiam  socios  eius  ad  tempus  aliquod  excellere  in  praefectura  politica,  ideo  etiam  donavit  eos  aliqua  parte  spiritus.  Sed  operae  pretium  est,  nobis  proponere  ante  oculos  Danielem,  quia,  sicuti  iam  dixi,  antequam  Deus  prophetam  illum  constitueret,  voluit  quasi  suis  insignibus  illum  ornare,  ut  iam  parata  esset  fides  eius  doctrinae.  Dicit  igitur  quatuor  illis  pueris,  hoc  est,  adolescentibus,  datam  fuisse  cognitionem  et  scientiam  in  omni  literatura  et  sapientia:  Danielem  vero  singulari  dono  fuisse  praeditum,  quod  scilicet  esset  somniorum  interpres,  deinde  visiones  intelligeret.  Quum  de  literatura  hic  loquitur  Daniel,  non  dubium  est  quin