35:553  553  SUR  LE  CANTIQUE  D'EZECHIAS.  554  Car  voyla  aussi  qui  nous  touche  plus  vivement,  quand  nous  faisons  comparaison  entre  la  parole  de  Dieu  et  ce  que  nous  sentons  de  ses  iugemens.  Si  Dieu  frappoit  simplement  sur  nous,  nous  pourrions  estre  eslourdis,  mais  quand  il  adiouste  sa  Parole  pour  nous  redarguer,  afin  que  nous  cognoissions  que  c'est  luy  qui  nous  chastie,  voire  a  cause  de  nos  pechez,  voyla  qui  est  cause  d'une  plus  grande  confusion.  Notamment  donc  Ezechias  dit  Que  selon  qu'il  a  parle  il  Va  aussi  fait.  Et  pourtant  la  dessus  il  conclud  qu'il  n'a  point  de  replique.  Car  nous  pourrions  bien,  ayans  a  faire  aux  hommes  mortels,  faire  nos  plaintes:  mais  quand  il  est  question  d'accuser  Dieu,  il  gaignera  tousiours  sa  cause.  Nous  pourrons  plaider  pour  un  temps,  mais  si  est-ce  qu'il  sera  tousiours  iustifie  apres  nous  avoir  condamnez.  C'est  donc  temps  perdu  que  de  cuider  amender  nostre  mal,  quand  nous  ne  passerons  point  condamnation  devant  Dieu,  mais  que  nous  tascherons  a  nous  rebecquer,  et  userons  de  murmures  et  de  querimonies.  Tout  cela  ne  fera  sinon  qu'aggraver  nostre  mal,  iusques  a  ce  que  nous  soyons  abysinez  du  tout.  Et  pourtant  ayons  la  bouche  close,  comme  il  est  dit  en  Iob.  Car  c'est  ce  que  le  bon  Roy  Ezechias  a  entendu  en  ce  passage.  Or  la  dessus  il  adiouste:  Que  tout  le  temps  de  sa  vie  il  aura  une  alleu,re  tremblante,  et  marchera  doucement  comme  un  homme  abbatu,  et  qui  traine  ses  iambes,  voire  en  l'amertume  de  son  ame.  Yci  Ezechias  declare  que  Dieu  luy  a  tellement  engrave  le  sentiment  de  ceste  correction,  et  l'a  tellement  imprime  en  son  coeur,  que  iamais  la  memoire  n'en  sera  effacee.  Il  pourra  advenir  souvent  (et  nous  l'experimentons  plus  qu'il  ne  seroit  mestier)  que  quand  Dieu  nous  presse,  nous  sommes  tant  estonnez  que  rien  plus,  nous  gemissons.  D'avantage,  s'il  est  question  de  confesser  nos  fautes  avec  humilite,  c'est  merveilles  que  de  nous  ouir.  Brief  nous  ne  sommes  point  chiches  en  parolles,  soit  pour  monstrer  la  grandeur  de  nostre  mal,  soit  pour  declarer  nos  fautes,  soit  pour  benir  le  nom  de  Dieu.  Mais  nous  ne  faisons  que  secourre  l'aureille  tantost  apres,  et  du  iour  au  lendemain  que  Dieu  nous  a  donne  quelque  relasche  ou  repos,  nous  n'y  pensons  plus.  Voyla  donc  comme  les  hommes  en  sont,  c'est  qu'ils  cherchent  Dieu  (comme  il  est  dit  au  Prophete)  cependant  qu'il  les  attire  comme  par  force:  alors  ils  l'invoquent,  et  confessent  la  dette,  comme  nous  avons  dit:  mais  si  tost  que  Dieu  les  espargne,  les  voyla  comme  devant,  ils  levent  la  teste  comme  des  cerfs,  ils  ne  font  que  se  iouer,  la  ou  auparavant  ils  estoyent  tant  abbatus  que  rien  plus,  et  avoyent  un  visage  si  effraye:  brief  il  n'y  avoit  qu'angoisse,  et  incontinent  apres  c'est  a  faire  grand'  chere:  ils  retournent  a  leurs  delices,  et  qui  plus  est,  il  semble