40:552  fluunt  omni  copia.  Non  spernenda  quidem  est  Dei  liberalitas,  ubi  nos  alit  pane,  et  vino,  et  aliis  cibis.  Nam  Paulus  utrumque  in  laude  ponit,  scire  ferre  abundantiam  et  penuriam  (Phil.  4,  12).  Quum  ergo  Dominus  largiter  nobis  profert  cibum  et  potum,  possumus  sobrie  et  frugaliter  vinum  bibere,  et  edere  cibos  suaviores.  Sed  ubi  Deus  aufert  nobis  et  panem  et  aquam,  ita  ut  nobis  pereundum  sit  inedia,  sciamus  sufficere  nobis  eius  benedictionem  pro  omnibus  alimentis.  Nam  videmus  Danielem,  et  eius  socios  fuisse  pulchros  et  nitidos,  fuisse  etiam  succulenta  carne,  quum  legumina  tantum  comederent.  Unde  hoc,  nisi  quia  Dominus,  qui  populum  suum  alere  potuit  in  deserto  solo  manna,  quum  non  suppeterent  alii  cibi,  convertit  etiam  hodie  nobis  cibos  in  manna,  qui  per  se  essent  noxii?  Nam  si  quis  interroget  medicos,  an  leguminibus  et  aliis  eiusmodi  vescendum  sit,  dicent  haec  omnia  esse  valde  noxia:  et  vere  hoc  sentient.  Sed  interea  ubi  non  est  nobis  ciborum  copia  ad  delectum,  ut  possimus  nobis  accipere  quod  valetudini  nostrae  melius  conducit,  si  contenti  sumus  herbis  et  radicibus,  Dominus  (quemadmodum  dixi)  poterit  nos  non  minus  alere,  quam  si  mensam  proponeret  bene  refertam  omnibus  lautitiis.  Sicuti  enim  temperantia  non  est  in  ipso  cibo,  sed  in  palato,  quia  si  voluptas  nos  allicit  ad  malos  cibos  appetendos,  nihilominus  sumus  intemperantes  :  rursum  si  vescimur  optimis  cibis,  hoc  non  obstat  nostrae  temperantiae.  Idem  etiam  tenendum  est  de  ipsa  facultate  alimentorum,  quod  scilicet  non  sustentat  nos  per  se  qualitas  huius  vel  illius  cibi,  sed  Dei  benedictio,  prout  illi  visum  est.  Videbimus  enim  interdum  divitum  liberos  esse  macilentos,  quum  tamen  habeatur  summa  ipsorum  cura:  videbimus  in  plebe  rustica  pueros  esse  pulcherrimos,  et  facie  bene  plena,  et  toto  corpore  succulento:  et  tamen  vescuntur  cibis  quibuslibet,  interdum  etiam  maxime  noxiis.  Sed  quia  carent  delitiis  urbanis,  ideo  Dominus  sua  benedictione  facit,  ut  crudi  fructus,  ut  caro  suilla,  laridum,  et  quidquid  tale  est,  et  olera  etiam  quae  videntur  deteriora  esse,  ut  haec  omnia  multo  magis  prosint,  quam  si  affluerent  omnes  delitiae.  Hoc  ergo  etiam  notandum  est  in  verbis  Danielis.  Sequitur,  16.  Et  factum  est,  ut  Melsar  tolleret  sibi  portionem  cibi  illorum  et  vinum  potionum  eorum  (hoc  est,  vinum  quod  rex  illis  in  potum  tribuerat),  et  daret  illis  legumina.  Postquam  videt  Melsar  se  posse  gratificari  Danieli,  et  sociis  absque  periculo,  imo  hoc  esse  ex  altera  parte  sibi  lucrosum,  facilis  fuit  et  humanus:  iam  non  opus  fuit  longa  disputatione.  Nam  saepe  a  spe  lucri  deterremur,  obiecto  discrimine  aliquo:  vel  si  magno  labore  constat  quod  alioqui  appetimus,