40:550  minibus,  ut  scilicet  assidue  gemeret,  et  in  animo  aleret  memoriam  patriae  suae,  cuius  statim  fuisset  oblitus,  si  demersus  fuisset  in  illas  aulicas  lautitias.  Sequitur,  14.  Et  audivit  eos  in  hoc  verbo,  et  probavit  eos  decem  diebus.  15.  Et  a  fine  decem  dierum  visus  est  vultus  eorum  pulcher  (vel,  nitidus),  et  (ipsi)  pinguiores  carne  prae  omnibus  pueris  (nempe  caeteris),  qui  comedebant  portionem  cibi  regii  Quia  hoc  mirabiliter  factum  est,  quod  Daniel  non  contraxit  maciem  nec  debilitatem  ex  sordido  illo  cibo,  sed  perinde  enituit  eius  facies,  ac  si  delicatissimos  quosque  cibos  comedisset,  hinc  colligimus  quod  iam  dixi,  nempe  impulsum  fuisse  divinitus,  ut  constanter  persisteret  in  suo  consilio,  ne  scilicet  se  pollueret  in  cibis  regiis.  Deus  ergo  re  ipsa  testatus  est  se  fuisse  autorem  Danieli  et  sociis  in  hoc  voto  et  proposito.  Certum  quidem  est,  non  esse  tantam  virtutem  in  pane,  ut  nos  sustineat.  Alimur  enim  arcana  Dei  benedictione,  sicuti  dicitur  apud  Mosem,  Non  vivit  homo  solo  pane,  hoc  est,  panis  non  suppeditat  hominibus  virtutem.  Neque  enim  panis  ipse  vitam  habet.  Quomodo  igitur  vitam  nobis  adferret?  Ergo  panis  nullius  per  se  virtutis  est,  sed  alimur  verbo  Dei,  hoc  est,  quia  Dominus  ita  statuit,  ut  alimentis  foveretur  vita  nostra.  Ideo  pani  inspiravit  virtutem.  Sed  debemus  interea  vitam  nostram  ferre  acceptam  non  pani,  neque  aliis  cibis,  sed  arcanae  Dei  benedictioni.  Non  enim  hic  loquitur  Moses  de  doctrina,  nec  de  vita  spirituali,  sed  dicit  vitam  nostram  corporalem  foveri  Dei  gratia,  qui  ita  indidit  proprium  munus  pani  et  reliquis  cibis.  Hoc  igitur  certum  est  in  genere,  quibuscunque  vescamur  cibis,  nos  ali  et  sustentari  gratuita  virtute  Dei.  Sed  exemplum  hoc  cuius  nunc  meminit  Daniel,  fuit  singulare.  Deus  ergo  (quemadmodum  iam  dixi)  re  ipsa  ostendit  non  aliter  posse  manere  Danielem  purum,  et  integrum  una  cum  sociis,  nisi  contentus  sit  leguminibus  et  aqua.  Hic  autem  notandum  est  primo  loco,  cavendum  sedulo  esse,  ne  gulae  simus  mancipia,  et  ita  retrahamur  tam  ab  officio  nostro,  quam  ab  obsequio  et  timore  Dei,  ubi  vivendum  nobis  est  tenuiter,  et  carendum  omnibus  lautitiis:  quemadmodum  hodie  videmus  multis  hanc  esse  summam  crucem,  nempe  si  non  liguriant  mensas  divitum,  quae  refertae  sunt  magna  copia  ciborum  et  varietate.  Alii  etiam  qui  iampridem  obduruerunt  ad  lautitias,  non  possunt  se  submittere,  neque  ulla  mediocritate  contenti  sunt.  Hinc  fit  igitur,  ut  semper  sordeant  in  luto  suo,  quia  scilicet  non  possunt  renuntiare  gulae  delitiis.  Atqui  Daniel  satis  nobis  ostendit,  ubi  Deus  non  modo  redigit  ad  inopiam,  sed  ubi  opus  est,  etiam  sponte  35*