1:55  [CO  1.  55]  quere  et  abnegare,  reputent  pro  se  quisque  singuli  et  tamen  hoc  tirocinio  discipulos  suos,  hoc  est,  pios  omnes  Christus  initiat  (Matth.  16).  Deinde  sic  per  omnem  vitam  sub  crucis  disciplina  erudit,  ne  cor  adiiciant  ad  bonorum  praesentium  vel  cupiditatem,  vel  fiduciam.  Breviter,  sic  fere  tractat,  ut  quocunque  flectant  oculos,  quam  longe [p. 100]  hic  mundus  patet,  non  nisi  desperationem  sibi  ubique  obversantem  habeant:  ut  Paulus  dicat  miserabiliores  nos  esse  omnibus  hominibus,  si  in  hoc  mundo  duntaxat  sperantes  sumus  (1  Cor.  15).  In  his  tantis  angustiis  ne  deficiant,  adest  illis  Dominus  qui  monet  ut  altius  caput  exerant  et  longius  oculos  coniiciant,  beatitudinem,  quam  in  mundo  non  vident,  apud  se  reperturos.  Hanc  beatitudinem,  praemium,  mercedem,  retributionem,  vocat;  non  operum  meritum  aestimans,  sed  compensationem  esse  significans  eorum  pressuris,  passionibus,  contumeliis  etc.  Quamobrem  nihil  obest,  quominus  vitam  aeternam,  remunerationem  scripturae  exemplo  vocemus,  quod  in  ea  Dominus  suos  ex  laboribus  in  quietem,  ex  afflictione  in  consolationem,  ex  moestitia  in  gaudium,  ex  ignominia  in  gloriam  recipiat,  omnia,  breviter,  quae  perpessi  sunt  mala,  bonis  maioribus  permutet.  Sic  et  nihil  erit  incommodi,  si  vitae  sanctitatem  existimemus  esse  viam,  non  quidem  quae  ducat,  sed  qua  electi  a  Deo  suo  in  gloriam  regni  coelestis  ducantur:  quoniam  haec  bona  eius  voluntas  est,  glorificare  quos  sanctificavit.  Hac  ratione,  observationes  mandatorum  aliquoties  vocantur  iustitiae  Domini;  non  quibus  Dominus  iustificet,  hoc  est,  iustos  habeat  ac  reputet,  sed  quibus [p. 101]  iustos  suos,  quos  iam  [OS  68]  ante  sua  gratia  iustificavit,  exerceat.  Verum,  si  quis  vel  minimam  salutis  nostrae  portionem  ad  opera  derivet,  is  totam  scripturam  pervertit  ac  corrumpit,  quae  solidam  laudem  divinae  bonitati  assignat.  Nomen  vero  meriti  qui  usurpat,  adversus  Dei  gratiam  blasphemiam  erigit,  quae  cum  illo  stare  non  potest:  certe  arrogantiae  et  ferocientis  adversus  Deum  vanitatis  plenum  est.  Deus  mercedem  et  remunerationem  pollicetur.  Audio.  Sed  nostrum  erat,  tantae  Dei  beneficentiae  gratias  agere,  per  quam  nobis  dari  agnosceremus,  quod  minime  debebatur,  non  animis  efferri  et  plus  arripere  quam  dabatur.  Qui  usumfructum  in  fundo  dono  accepit,  si  fundi  etiam  proprietatem  sibi  vindicet,  nonne  tali  ingratitudine  illum  ipsum  quem  possidebat  usumfructum  amittere  meretur?  Et  hos  scilicet  impune  adversus  tantam  suam  gratiam  tam  ingratos  Dominus  feret?