40:549  549  IN  DANIELEM.  CAP.  I.  550  metuebat  suo  capiti:  sed  nunc  excogitavi  novam  rationem,  qua  et  nobis  gratificeris,  et  tamen  non  possis  trahi  in  crimen,  quia  res  prorsus  latebit.  Proba  igitur  diebus  decem  servos  tuos,  et  experire,  dentur  nobis  tantum  legumina,  detur  aqua  quam  bibamus:  Iam  si  post  tempus  illud  facies  nostrae  fuerint  pulchrae  et  nitidae,  nulla  erit  de  te  sinistra  suspicio,  et  nemo  poterit  persuaderi  quin  nos  educaveris  laute,  prout  a  rege  mandatum  fuit.  Quum  ergo  probatio  haec  tibi  sit  tuta,  et  non  minus  caveas  tibi  quam  nobis,  iam  non  est  cur  reiicias  preces  nostras.  Caeterum  non  dubium  est,  quum  Daniel  in  medium  hoc  protulit,  quin  directus  fuerit  Dei  spiritu  ad  hanc  prudentiam,  et  simul  etiam  impulsus,  ut  hoc  peteret.  Fuit  ergo  singulare  spiritus  donum,  quod  Daniel  modum  invenit,  quo  posset  flectere  animum  ministri,  sub  cuius  erat  custodia.  Sed  tenendum  etiam  rursus  est  illud,  nempe  non  temere,  neque  proprio  motu  haec  dixisse,  sed  instinctu  spiritus  sancti.  Fuisset  enim  non  solertia,  sed  potius  temeritas,  si  Daniel  sibi  fabricasset  hoc  consilium,  et  non  fuisset  certior  factus  a  Domino  de  felici  eventu.  Non  est  igitur  dubium  quin  hoc  habuerit  ex  arcana  revelatione,  feliciter  et  ex  voto  cessurum,  si  permitteret  minister  ipsum  et  socios  vesci  leguminibus.  Et  ideo  dixi  non  ita  loquutum  esse,  nisi  duce  spiritu  et  magistro.  Hoc  autem  ideo  notatu  utile  est,  quia  saepe  nobis  multa  permittimus,  in  quibus  nos  tandem  eventus  fallit,  quia  scilicet  rapimur  proprio  carnis  sensu,  neque  expendimus  quid  Deo  placeat.  Non  mirum  est  igitur,  quum  homines  varias  spes  concipiunt,  si  sentiant  tandem  se  fuisse  deceptos,  quia  nemo  est  qui  stulte  sperando  non  sit  sibi  impostor,  et  qui  non  se  ipsum  frustretur.  Neque  enim  nostrum  est  quidquam  nobis  promittere.  Ergo  notemus  Danielem,  quia  non  susceperat  neque  aggressus  fuerat  quod  vidimus,  stulto  zelo,  ita  etiam  non  loqui  nunc  inconsiderate,  sed  a  spiritu  Dei  factum  esse  certiorem  quid  futurum  esset.  Dicit  autem,  Apponantur  nobis  legumina  quibus  vescamur,  et  aqua  quam  bibamus.  Videmus  non  ideo  abstinuisse  quatuor  pueros  a  cibo  regio,  ne  quam  immunditiem  attingerent.  Neque  enim  lex  unquam  prohibuit  vinum  bibere,  nisi  Nazaraeis:  et  licebat  vesci  carnibus,  quarum  copia  multiplex  erat  in  mensa  regia.  Unde  ergo  ista  religio?  nempe  (sicuti  heri  dictum  fuit)  quia  nolebat  Daniel  assuescere  ad  delitias  aulicas,  quibus  statim  factus  esset  degener.  Voluit  igitur  non  tantum  frugaliter,  sed  tenuiter  etiam  corpus  suum  alere,  ut  nunquam  sibi  in  sorte  illa  placeret:  quamvis  etiam  eveheretur  ad  summos  honores,  ut  tamen  semper  esset  quasi  miserrimus  inter  captivos.  Non  est  cur  alias  rationes  quaeramus  in  hac  abstinentia  Danielis.  Poterat  quidem  etiam  pane  cibario  vesci,  et  aliis  cibis  parum  delicatis:  sed  contentus  fuit  legu-