5:548  l'homme  est  Seigneur  mesme  du  Sabbat  (Luc  6,  5).  Item,  ceux  qui  president  ont  commandement  d'ordonner  et  de  confermer  diligemment  la  discipline  qui  despend  de  la  clef  de  iurisdiction,  et  sans  laquelle  la  vigueur  Evangelique  ne  peult  demourer  en  son  entier.  Aussi  est  commande  aux  subiectz  d'obeir  a  ceux  qui  sont  preposez  sus  iceux,  en  telle  sorte  [fol.  43]  toutesfoys,  que  ces  Ceremonies,  et  discipline  soient  instituees  et  administrees  en  l'Eglise  pour  ceste  fin,  non  qu'en  icelles  soit  mise  fiance  de  salut,  laquelle  consiste  en  la  grace  de  nostre  Seigneur  Iesus  Christ.  Car  ce  seroit  en  vain  honnorer  Dieu  par  les  commandemenb  des  hommes,  contre  le  commandement  du  Seigneur  (Matth.  15,  8):  mais  tant  seulement  a  ce  qu'elles  excitent,  et  retiennent  piete,  affin  que  toutes  choses  soient  faictes  en  l'Eglise,  selon  reverence  divine,  honnestete  et  ordre:  lesquelles  aussi  seront  de  telle  sorte  qu'elles  ne  discorderont  aucunement  de  la  purete  et  simplicite  Evangelique,  ne  iettans  aucuns  laqz  aux  consciences,  ne  derogant  en  rien  a  la  liberte  chrestienne.  Or  la  liberte  Chrestienne  gist  principallement  en  cecy,  que  nous  qui  sommes  delivrez  de  la  contraincte  de  la  loy,  par  la  grace  de  Iesus  Christ,  et  donation  du  sainct  Esprit:  faisans  de  nostre  bon  gre,  ce  que  la  loy  moralle  commande,  sachons  que  nostre  iustice,  qui  doit  estre  spirituelle,  ne  depend  point  des  observations  externes.  Ainsi  qu'icelles,  selon  qu'elles  ont  este  instituees,  pour  retenir  et  fortifier  la  foy  et  charite  des  infirmes,  doivent  donner  lieu  a  charite:  et  que  mesme  si  la  chose  ainsi  le  requiert,  elles  peuvent  estre  delaissees  sans  peche  :  moyennant  toutesfoys,  qu'il  n'y  ayt  point  de  scandale  ny  mespris.  Car  cela  doit  tousiours  estre  pardessus:  Ieveulx  misericorde  et  non  sacrifice  (Matth.  12,  7).  Iusque  icy  nous  avons  parle  des  marques  et  authorite  de  l'Eglise  en  general.  Certains  articles,  lesquelz  estans  declarez  par  l'authorite  de  l'Eglise,  ont  este  establis  en  icelle.  Il  est  aussi  de  besoing  que  nous  facions  mention  en  especial  de  certaines  choses,  lesquelles  par  ceste  authorite,  de  laquelle  l'Eglise  use,  tant  pour  iuger  entre  les  escriptures  et  doctrines,  que  pour  la  conservation  de  police,  ont  este  ordonnees  et  establies.  Donc  les  articles  suyvans  sont  de  ceste  premiere  authorite,  par  laquelle  l'Eglise  iuge  de  l'interpretation  de  l'escripture,  intelligence  et  [fol.  44]  sens  d'icelle,  et  sont  comme  expositions  enseignees  divinement:  comme  le  Symbole  des  Apostres,  de  la  Trinite  en  mesme  substance,  de  l'equalite  des  personnes,  des  deux  natures  et  unite  de  personne  en  Christ,  de  deux  sortes  de  volunte  en  Christ,  du