40:548  huic  errori,  sibi  etiam  esse  licitum  vivere  more  vetusto,  quia  scilicet  ita  fuerint  educati,  et  hoc  illis  traditum  fuerit  a  maioribus.  Ritus  ergo  usurpant  quos  sustinent  a  nobis  improbari.  Sic  etiam  hic  praefectus  poterat  recte  sentire  de  Daniele,  et  eius  sociis:  interea  non  fuit  eo  usque  tactus,  ut  discere  cuperet  quidnam  differret  una  religio  ab  altera.  Simpliciter  ergo  excusat  sibi  non  esse  liberum,  permittere  Danieli  quod  petierat,  quoniam  hoc  futurum  esset  capitale  apud  regem.  Nunc  sequitur,  11.  Et  dixit  Daniel  ad  Meltsar,  quem  constituerat  praefectus  eunuchorum  super  Danielem,  Hananiah,  Misael,  et  Azariah.  12.  Proba  (vel,  experire)  servos  tuos  diebus  decem,  et  apponantur  nobis  de  leguminibus  (legumina  simpliciter),  et  comedemus  (quae  comedamus),  et  aquae,  quas  bibamus.  13.  Et  inspiciantur  coram  facie  tua  vultus  nostri,  et  vultus  puerorum,  qui  vescuntur  portione  (frusto,  quemadmodum  diximus)  cibi  regis:  et  quemadmodum  videris  fac  cum  servis  tuis.  Quia  intellexerat  Daniel  ex  responso  praefecti  non  posse  impetrari  ab  ipso  quod  optabat,  ideo  alloquitur  eius  ministrum.  Praefectus  enim  sub  se  habuit  complures  ministros,  quemadmodum  scimus  esse  usitatum  in  magnis  praefecturis.  Nam  probabile  est,  fuisse  idem  officium  praefecti  illius,  quod  hodie  est  magni  scutarii,  quem  vocant  in  Gallia.  Erat  igitur  unus  ex  ministris,  sub  cuius  custodia  erant  Daniel  et  socii.  Ad  hoc  remedium  descendit  Daniel,  et  obtinet  quod  cupit:  non  tamen  sine  artificio,  ut  videbimus.  Hic  autem  perspicitur  rara  Danielis  constantia,  qui  post  rem  irustra  tentatam  non  tamen  desinit  tendere  ad  suum  scopum.  Et  hoc  est  verum  et  serium  fidei  examen,  ubi  non  fatigamur,  si  quid  nobis  occurrat  adversum:  neque  putamus  viam  ideo  nobis  clausam  esse.  Ergo  si  cursum  protinus  non  retro  flectimus,  sed  tentamus  omnes  alias  vias,  tunc  vere  ostendimus  radicem  pietatis  in  cordibus  nostris  fixam  esse.  Potuit  videri  excusabilis  Daniel,  postquam  repulsam  passus  fuerat.  Quis  enim  non  dixisset  defunctum  esse  suis  partibus?  Sed  superavit  hoc  obstaculum.  Et  quia  apud  summum  praefectum  nihil  adeptus  est,  ad  ministrum  eius  descendit.  Fuit  autem  hoc  non  vulgaris  prudentiae,  petere  ut  periculum  faceret.  Neque  enim  potuit  obiicere  hic  minister  quod  nunc  audivimus  fuisse  responsum  a  praefecto.  Nec  dubium  est  quin  aliquid  cognoverit  tam  de  precibus  Danielis,  quam  de  repulsa  et  negatione.  Ideo  antevertit  Daniel,  et  ostendit  quomodo  possit  annuere  minister  ille  sine  ullo  periculo:  quasi  diceret,  Nos  quidem  ideo  non  impetravimus  a  praefecto,  quia