35:548  horreur,  quand  Dieu  nous  est  contraire.  Et  voyla  aussi  dont  procedent  toutes  ces  complaintes  que  nous  voyons  aux  Pseaumes.  Ceux  qui  ne  sont  point  exercez  en  ces  combats,  en  ces  troubles  et  perplexitez,  pensent  que  David  ait  voulu  faire  son  mal  beaucoup  plus  grand  qu'il  n'estoit,  ou  bien  il  leur  semble  qu'il  ait  este  trop  delicat.  Mais  quand  nous  venons  a  l'espreuve,  nous  sentons  qu'il  n'y  a  point  un  mot  superflu:  car  les  effroits  que  sentent  les  fideles,  quand  Dieu  les  sonde  a  bon  escient,  et  au  vif,  surmontent  tout  ce  qu'on  peut  exprimer  de  bouche.  Ne  pensons  point  donc  que  ceste  similitude  qui  est  yci  mise  par  le  Roy  Ezechias  soit  superflue:  car  nous  trouverons  la  maieste  de  Dieu  plus  espovantable  beaucoup  que  tous  les  maux,  qui  sont  yci  contenus,  n'expriment,  quand  il  luy  plaira  de  nous  appeler  a  conte,  et  nous  faire  sentir  qu'il  est  nostre  Iuge.  Car  si  les  montagnes  tremblent  devant  luy  et  s'escoulent,  et  nous,  qui  ne  sommes  rien,  comment  pourrons-nous  subsister  ?  Ainsi  donc,  notons  bien,  quand  quelques  fois  Dieu  nous  ostera  le  goust  de  sa  bonte,  et  que  nous  cuiderons  estre  retranchez  de  son  Royaume,  que  nous  n'apperceverons  que  nos  pechez,  que  ce  sont  comme  des  gros  amas  de  bois  pour  allumer  le  feu  de  son  ire:  que  nous  regardions  d'autant  qu'il  est  tout-puissant,  qu'il  faut  aussi  qu'il  foudroye  et  qu'il  nous  abysme.  Quand  nous  sentons  ces  choses,  il  faut  bien  que  nous  soyons  du  tout  opprimez,  iusques  a  ce  qu'il  nous  releve.  Et  de  faict,  en  une  minute  de  temps  nous  serions  plongez  iusqu'au  plus  profond  d'enfer,  n'estoit  qu'il  nous  tient  la  main  forte,  et  que  d'une  facon  secrete  nous  fussions  retenus  de  luy,  encores  que  nous  ne  voyons  pas  comment.  Voyci  donc  une  doctrine  qui  nous  doit  servir  d'un  coste  a  nous  humilier,  que  nous  oublions  tout  ce  que  les  hommes  cuident  avoir  de  vertu  en  eux,  et  puis  que  nous  acquiescens  a  la  maieste  de  Dieu,  et  que  nous  soyons  du  tout  abbatus  sous  icelle  :  et  que  cependant  nous  cognoissions  le  besoin  et  la  necessite  que  nous  avons  qu'il  nous  retiene,  voire  d'une  facon  qui  nous  est  incomprehensible,  et  quand  nous  penserons  estre  du  tout  delaissez  de  luy,  et  qu'il  nous  ait  mis  en  oubli,  soyons  certain  qu'encores  nous  tiendra-il  la  main:  nous  ne  l'apperceverons  pas,  mais  si  le  fera-il  pourtant;  et  aussi  iamais  nous  ne  pourrions  sortir  d'un  tel  labirinthe,  sinon  que  par  sa  misericorde  infinie  il  nous  en  retirast:  comme  il  est  certain  que  iamais  Ezechias  n'eust  este  releve,  sinon  que  Dieu  par  son  sainct  Esprit  l'eust  soustenu  au  dedans,  et  qu'il  luy  eust  esclaire,  cependant  qu'il  estoit  en  ces  grans  troubles.  Or  apres  qu'il  a  parle  ainsi  il  adiouste,  Seigneur,  le  mal  me  force,  soulage  moy.  Mais  que  dlray-ie?  O  est  luy  qui  Va  fait  comme  il  Va  dit.