32:548  rendons  l'honneur  qui  luy  appartient,  et  tel  qu'il  merite  en  le  tenant  pour  veritable  et  fidele.  Voyla  quant  au  premier.  Et  puis  pour  le  second,  advisons  a  edifier  nos  prochains,  afin  qu'ils  soyent  confermez  par  nostre  exemple,  et  que  tous  esperent  en  Dieu  d'un  commun  accord,  et  que  les  meschans  soyent  rendus  confus:  que  nous  les  puissions  despiter,  que  nous  ayons  dequoy  nous  glorifier,  nonobstant  toutes  leurs  embusches  quand  ils  auront  machine  tout  ce  qu'ils  auront  peu  a  l'encontre  de  nous,  qu'ils  auront  pense  de  nous  rendre  prophanes  comme  ils  sont,  que  nous  les  puissions  reietter  a  l'exemple  de  David.  Voyla  donc  la  parole  qu'il  demande  d'avoir  tousiours  en  la  bouche,  pour  confermer  ceux  qui  voudront  mettre  leur  esperance  en  Dieu,  et  pour  rendre  confus  tous  ceux  qui  se  moquent  de  ses  promesses,  et  de  sa  verite.  Mais  que  veut  dire  ce  mot,  Par  trop?  C'est  qu'estant  comme  abandonne  de  Dieu  en  ses  afflictions,  il  estoit  quasi  muet  et  sans  replique,  ainsi  qu'il  sfe  complaind  en  un  autre  passage.  Et  de  faict,  cependant  que  Dieu  ne  nous  monstre  nul  signe  de  sa  grace,  encores  que  nos  ennemis  se  gaudissent  de  nous  a  pleine  bouche,  nous  n'avons  pas  liberte  de  les  rembarrer.  David  donc  ayant  este  ainsi  tente  pour  quelque  temps,  demande  que  la  confession  par  laquelle  il  puisse  magnifier  Dieu,  ne  luy  soit  pas  ostee  pour  tousiours.  En  quoy  nous  avons  a  observer  que  si  Dieu  nous  laisse  quelque  fois  confus  selon  le  monde,  au  lieu  d'estre  estonnez  nous  1e  devons  requerir  qu'il  ne  permette  point  que  nous  ayons  la  boucbe  close  a  iamais.  Or  il  reitere  encores,  Car  i'ay  espere  en  tes  droitures.  Ce  n'est  pas  sans  cause  que  David  fait  encores  ceste  protestation:  car  comme  i'ay  desia  dit,  voyci  qui  nous  fait  sentir  l'efficace  de  la  Parole  de  Dieu  (suyvant  aussi  le  passage  que  i'ay  allegue  de  l'Epistre  aux  Hebrieux)  quand  avec  icelle  nous  avons  aussi  l'esperance,  laquelle  depend  de  la  foy.  Ii  est  vray  que  Dieu  avoit  tendu  la  main  a  son  peuple,  quand  il  le  retira  du  pays  d'Egypte,  afin  de  le  mener  en  cest  heritage  qu'il  luy  avoit  promis.  Mais  quoy?  le  peuple  ne  s'arreste  point  a,  Dieu:  il  faut  que  ceste  promesse  soit  aneantie,  voire  quant  a  eux  qui  ont  este  ainsi  incredules.  Dieu  ne  laisse  pas  de  trouver  un  moyen  admirable  et  tout  nouveau,  et  lequel  estoit  incognu  aux  hommes,  de  faire  ce  qu'il  avoit  dit.  Mais  ce  n'est  point  au  profit  de  ceux  qui  estoyent  incredules,  car  les  voyla  forclos  d'un  tel  benefice:  ils  sont  privez  de  cest  heritage  qui  leur  estoit  promis.  Apprenons  donc,  quand  nous  voudrons  que  Dieu  desploye  sa  main  envers  nous,  qu'il  nous  face  sentir  sa  vertu,  et  que  nous  appercevions  le  fruit  de  ses  promesses,  qu'il  faut  qu'elles  soyent  bien  plantees  en  nos  coeurs:  et  que  nous  puissions  dire  a  l'exemple  de  David,  Seigneur,  i'ay  espere  en  tes  droitures.  Or  par  ce  mot