32:547  547  SIXIEME  SERMON  548  envers  nous,  qu'elles  nous  ouvrent  la  porte  pour  venir  a  luy,  que  ce  soyent  comme  les  clefs  pour  nous  y  donner  entree,  afin  que  nos  requestes  soyent  receues?  Il  faut  que  l'esperance  soit  coniointe  avec.  Et  voyla  pourquoy  nous  ne  sentons  point  la  vertu  des  promesses  de  Dieu  comme  nous  devrions:  car  il  n'y  a  nulle  esperance.  Il  est  vray,  que  Dieu  de  son  coste  demeure  tousiours  veritable:  et  combien  que  nous  soyons  povres  incredules,  si  est-ce,  qu'il  ne  faussera  point  la  foy  qu'il  nous  a  donnee.  Mais  quoy?  Nous  ne  sommes  pas  dignes  de  sentir  un  tel  bien.  Dieu  nous  avoit  promis  de  desployer  sa  grace  sur  nous,  comme  aussi  il  nous  la  presente:  mais  nous  ne  sommes  pas  dignes  de  cela,  sinon  que  nous  croyons  en  ses  promesses.  Voulons-nous  donc  que  Dieu  nous  face  selon  sa  Parole?  Il  faut  que  ceste  Parole  soit  receue  de  nous,  et  qu'elle  soit  coniointe  a  la  foy:  comme  aussi  l'Apostre  en  traitte.  Voyla  quant  a  ces  deux  premiers  versets.  Or  il  s'ensuit,  N'oste  point  par  trop  la  Parole  de  verite  de  ma  bouche,  car  ie  me  suis  attendu  a  tes  droitures.  Quand  David  dit,  N'oste  point  la  Parole  de  verite  de  ma  bouche,  ce  n'est  pas  qu'il  luy  suffise  de  pouvoir  magnifier  Dieu  de  langue,  et  faire  de  belles  protestations  devant  les  hommes:  mais  il  presuppose  que  quand  il  aura  rendu  tesmoignage  de  la  verite  de  Dieu  par  sa  bouche,  qu'elle  sera  plantee  dedans  son  coeur.  Et  de  fait,  David  ne  parle  point  yci  en  hypocrisie,  comme  ceux  qui  voudront  avoir  belle  apparence  devant  les  hommes:  et  ce  leur  est  assez  quand  on  aura  cognu  qu'ils  sont  bien  fideles,  qu'ils  auront  eu  bonne  renommee,  qu'on  les  aura  reputez  gens  de  bien,  c'est  tout,  ce  leur  semble.  Or  David  n'y  a  pas  ainsi  procede:  mais  quand  il  dit,  que  Dieu  ne  permette  point,  que  la  Parole  de  verite  luy  soit  ostee  de  la  bouche,  c'est  comme  s'il  disoit,  Seigneur,  non  seulement  fay  moy  ceste  grace  que  i'espere  en  toy  en  mon  secret,  que  ie  m'arreste  a  tes  promesses,  et  que  ie  tienne  bon  contre  tous  les  assauts  de  mes  ennemis,  mais  mesmes  devant  les  hommes:  que  ma  foy  se  declare,  que  par  ce  moyen  ie  conduise  et  instruise  tous  ceux  qui  voudront  aussi  venir  a  toy:  et  au  contraire,  que  ie  puisse  resister  a  tous  ceux  qui  viendront  pour  renverser  ceste  esperance  spirituelle  que  i'ay  en  toy  et  en  ta  verite.  Seigneur  donc,  quand  tu  auras  bien  enracine  ta  Parole  en  mon  coeur,  qu'elle  soit  aussi  quant  et  quant  en  la  bouche,  et  que  ie  te  puisse  magnifier  devant  les  hommes.  Nous  avons  donc  a  retenir  de  ce  passage,  qu'en  premier  lieu  il  nous  faut  estre  asseurez  de  la  verite  de  Dieu,  voire  combien  qu'il  n'y  ait  personne  qui  nous  voye:  combien  que  chacun  soit  recueilly  en  son  secret,  qu'il  n'y  ait  point  de  tesmoins  de  ce  monde,  que  Dieu  cognoisse  avec  ses  Anges  comme  nous  l'estimons  vraye  et  certaine,  et  que  nous  luy