40:546  quutio,  ut  vobis  exposita  fuit,  familiaris  est  Hebraeis:  quemadmodum  ubi  dicitur  Psalmo  106  (v.  46).  Posuit  Deus  Iudaeos  in  miserationes  gentium,  quae  eos  duxerant  captivos:  hoc  est,  fecit  ne  saevirent  adeo  crudeliter  victores  adversus  ipsos,  quemadmodum  initio  fecerant.  Scimus  enim  duriter  et  aspere  et  contumeliose  etiam  saepe  fuisse  tractatos  Iudaeos.  Quod  autem  mitigata  fuit  illa  inhumanitas,  propheta  tribuit  Deo,  qui  dedit  populum  suum  in  miserationes.  Summa  est,  Danielem  adeptum  fuisse  gratiam  apud  praefectum,  quia  cor  hominis  alioqui  parum  mansueti  Deus  flexit  ad  clementiam  et  humanitatem.  Ideo  autem  hoc  narravit,  quo  simus  magis  strenui  ad  officium,  si  quando  discrimen  aliquod  nobis  subeundum  est,  ubi  Deus  nos  vocat.  Saepe  hoc  continget,  ut  non  sit  nobis  integrum  praestare  quod  Deus  iubet,  atque  exigit,  sine  praesenti  vitae  periculo.  Quia  autem  maxime  crucem  refugimus,  obrepit  ignavia  et  mollities.  Daniel  igitur  ut  animos  nobis  faciat,  ubi  obtemperandum  est  Deo  et  eius  mandatis,  hic  exprimit  se  fuisse  in  favore  praefecti,  quia  scilicet  Deus  conciliavit  servo  suo  fideliter  officium  praestanti  favorem.  Ergo  discamus  reiicere  curas  nostras  in  Deum,  ubi  instabit  nobis  terror  a  mundo,  vel  ubi  minaciter  etiam  vetabunt  nos  homines,  ne  Deo  morem  geramus.  Hic  sciamus  esse  in  manu  Dei,  flectere  eorum  corda,  qui  contra  nos  insaniunt,  ita  ut  nos  liberet  ab  omni  periculo.  Hic  ergo  finis  est,  cur  dicat  Daniel  praefectum  fuisse  sibi  humanum.  Interea  etiam  colligimus  generalem  doctrinam  ex  hoc  loco,  nempe  hominum  corda  gubernari  divinitus:  ita  ut  emolliat  ferream  duritiem,  reddat  ex  lupis  agnos,  quoties  visum  est.  Nam  quum  redemit  populum  suum  ex  Aegypto,  simul  etiam  dedit  gratiam  apud  Aegyptios,  ut  pretiosissima  quaeque  vasa  secum  auferrent.  Certum  est  Aegyptios  fuisse  perverso  animo  erga  Israelitas:  cur  ergo  tam  liberaliter  proferunt  quidquid  domi  suae  earum  et  pretiosum  habent?  Nempe  quia  Dominus  tunc  novum  affectum  indidit  eorum  cordibus.  Sic  etiam  rursum  Dominus  potest  exasperare  eos  qui  nobis  amici  erant,  ita  ut  hostiliter  postea  contra  nos  insurgant.  Sciamus  ergo  utrumque  penes  Dei  esse  arbitrium,  nempe  ut  flectat  corda  hominum  ad  humanitatem,  deinde  etiam  ut  obduret  corda,  quae  per  se  mansueta  erant.  Verum  quidem  est,  cuique  proprium  esse  ingenium  ab  utero.  Alii  enim  sunt  feroces,  truculenti  et  sanguinarii:  alii  autem  sunt  comes,  et  humani,  et  tractabiles.  Haec  varietas  est  ex  arcana  Dei  ordinatione:  sed  Deus  non  tantum  ab  utero  format  cuique  ingenium,  sed  singulis  diebus,  si  ita  videtur,  imo  singulis  momentis  mutat  uniuscuiusque  affectum:  sicuti  etiam  excaecat  mentes,  vel  excitat  rursum  a  stupore.  Videbimus  enim  rudissimos  homines  pollere  acumine,  vel  habere  singulare  aliquod  consilium  in  una  actione:  alios  35