40:545  545  IN  DANIELEM.  CAP.  I.  546  fuit  illis,  vel  abominatio,  vesci  lautitiis  illis,  et  comedere  ex  regis  mensa.  Notandus  igitur  est  finis  cur  Daniel  censeat  se  pollui  si  sumptuose  vivat,  et  comedat,  et  bibat  ex  portione  regis,  nempe  quia  (ut  iam  dictum  fuit)  conscius  sibi  propriae  infirmitatis,  voluit  in  tempore  praecavere,  ne  talibus  illecebris  captus  deficeret  a  pietate  et  cultu  Dei,  et  degeneraret  in  mores  chaldaicos,  quasi  esset  inde  oriundus,  et  unus  ex  aliorum  principum  numero.  Reliqua  differam  in  crastinum.  9.  Dederat  autem  Deus  Danielem  (posuerat  Danielem)  in  clementiam  et  miserationes  coram  praefecto  eunuchorum.  Retulit  heri  Daniel  quid  petiisset  a  magistro,  cuius  curae  mandatus  fuerat:  nunc  interserit  hanc  sententiam,  ut  sciamus  postulationem  illam  non  fuisse  ei  fraudi,  quod  praefectus  eunuchorum  humaniter  cum  ipso  egit.  Fuisset  enim  hoc  capitale  crimen,  si  Daniel  ad  regem  delatus  esset.  Quanquam  enim  verisimile  est  non  fuisse  usum  verbo  polluendi,  neque  palam  et  diserte  vocasse  cibos  regios  inquinamenta,  potuit  tamen  facile  coniici  ex  eius  verbis  quod  ipse  nunc  refert,  nempe  ideo  se  rogasse  praefectum,  ut  liceret  vesci  leguminibus,  quia  non  putabat  sibi  licitum  esse  ali  cibo  regio.  Causam  heri  attulimus:  sed  rex  babylonius  poterat  statim  excandescere,  si  hoc  rescivisset.  Quid?  Ego  habeo  in  honore  captivos  istos,  possem  illis  abuti  tanquam  mancipiis:  atqui  perinde  alo  ipsos  delicate  atque  proprios  filios:  interea  quasi  ego  sim  homo  pollutus,  respuunt  cibum  meum.  Haec  igitur  ratio  est  cur  Daniel  hic  recitet  se  fuisse  in  gratia  illius  praefecti.  Nam  (ut  videbimus  proximo  versu)  praefectus  simpliciter  negavit  quod  petebat:  ubi  igitur  favor  ille?  Sed  quanquam  noluit  acquiescere  precibus  Danielis,  fuit  tamen  haec  rara  humanitas,  quod  non  detulerit  eum  ad  regem,  sicuti  aulici  captandae  gratiae  causa  propensi  sunt  ad  quamlibet  accusationem.  Deinde  fieri  potest  ut  praefectus  sciret  hoc  concessum  fuisse  Danieli  a  suo  ministro.  Si  qua  igitur  fuit  conniventia  in  praefecto,  haec  est  gratia  et  commiseratio,  de  qua  nunc  loquitur  Daniel.  Consilium  quidem  eius  ambiguum  non  est,  quod  scilicet  non  dubitaverit  adire  vitae  discrimen,  ut  maneret  purus  et  integer,  neque  sese  contaminaret  delitiis  aulae  babylonicae.  Exprimit  enim  quomodo  evaserit  periculum,  quia  scilicet  praefectus  clementer  cum  ipso  egit,  quum  posset  statim  obiicere  ad  mortem.  Sed  notanda  est  loquendi  forma,  qua  hic  utitur,  quod  scilicet  Deus  posuerit  Ulum  in  gratiam  et  miserationes  coram  praefecto  illo.  Poterat  communi  more  dicere  se  fuisse  gratiosum,  sed  adscribit  hoc  beneficio  Dei,  quod  expertus  fuerit  barbarum  hominem  adeo  humanum  et  propitium.  Lo-  Calvini  opera.  Vol.  XL.