40:544  igitur  vivere  in  Chaldaea  ita  ut  recordaretur  se  esse  exsulem  et  captivum,  oriundum  autem  ex  sacro  genere  Abrahae.  Videmus  nunc  quale  fuerit  consilium  Danielis.  Noluit  igitur  tantum  sibi  temperare  a  nimia  ciborum  copia,  vel  a  delitiis,  sed  voluit  deflectere  a  laqueis  Satanae,  quos  videbat  sibi  esse  circumdatos.  Nec  dubium  est  quin  sibi  conscius  fuerit  propriae  infirmitatis:  et  hoc  etiam  hi  magna  laude  ponendum  est,  quod  sibi  diffisus  voluit  procul  fugere  omnes  illecebras  et  captationes.  Nam  quod  ad  mentem  regis  spectat,  hoc  fuit  certe  diabolicum  aucupium,  sicuti  dixi:  Daniel  hoc  repudiavit:  nec  dubium  est  quin  Deus  illuxerit  suo  spiritu  eius  menti,  ut  mature  sibi  praecaveret.  Ergo  noluit  se  proiicere  in  plagas  diaboli,  sed  libenter  abstinuit  a  cibo  et  potu  regio.  Haec  summa  est.  Potest  etiam  quaeri,  cur  hanc  sibi  laudem  vendicet  Daniel,  quae  communis  tamen  erat  cum  sociis.  Neque  enim  solus  ipse  reiecit  potum  et  cibum  regium.  Sed  quoniam  necesse  erat  hoc  cognosci,  fuisse  iam  ab  ipsa  pueritia  gubernatum  a  Dei  spiritu,  quo  maior  esset  eius  doctrinae  fides  et  autoritas,  ideo  dicit  se  peculiariter  loquutum  fuisse,  non  iactantiae  causa,  sed  ut  conciliet  fidem  suae  doctrinae,  et  ostendat  se  longo  tempore  fuisse  formatum  et  politum  a  Deo  ad  munus  propheticum.  Interea  notandum  est,  Danielem  fuisse  autorem  sociis  suis.  Neque  enim  hoc  illis  venisset  in  mentem,  et  poterant  corrumpi,  nisi  admoniti  fuissent  a  Daniele.  Deus  ergo  voluit  Danielem  esse  ducem,  et  magistrum  suis  sociis,  ut  eos  ad  hanc  abstinentiam  adduceret.  Hinc  autem  colligimus,  ut  quisque  nostrum  praeditus  est  uberiore  spiritus  gratia,  ita  obstringi  ad  alios  docendos.  Neque  enim  satis  erit,  si  quisque  sibi  temperet,  et  quemadmodum  edoctus  est  a  spiritu  Dei  ita  sese  contineat  in  officio,  nisi  etiam  aliis  porrigat  manum,  et  studeat  sibi  adiungere  in  societatem  pietatis,  timoris,  et  cultus  Dei.  Tale  exemplum  nobis  hic  in  Daniele  proponitur,  qui  non  tantum  respuit  delitias  aulae,  quibus  poterat  inebriari,  imo  qtiae  instar  veneni  fuissent,  sed  etiam  socios  admonet,  ut  idem  faciant,  et  illis  persuadet.  Haec  ratio  est  cur  pollutionem  vel  abominationem  vocet,  gustare  cibum  regium.  Non  fuit  quidem  hoc  per  se  abominabile,  sicuti  dixi.  Liberum  enim  erat  Danieli  comedere,  et  bibere  in  mensa  regis:  sed  abominatio  fuit  propter  consequentiam.  Ante  illud  tempus  quum  iam  in  Chaldaea  essent  quatuor  isti,  non  dubium  est  quin  cibum  sumpserint  communi  more,  et  quidquid  oblatum  erat,  quin  sibi  permiserint  inde  edere.  Non  ergo  legumina  petebant  quum  essent  in  diversorio,  et  in  toto  itinere,  sed  iam  coeperunt  legumina  petere,  quum  rex  vellet  eos  inficere  suis  delitiis,  et  ita  eos  captare,  ut  mallent  conditionem  illam  quam  redire  ad  suos.  Quum  ergo  viderent  ita  sibi  tendi  insidias,  tunc  pollutio