9:543  543  RESPONSIO  544  colligere  promptum  est,  susque  deque  facere  bonum  virum,  si  conscientiae  humanis  decretis  serviliter  opprimantur,  modo  absque  valetudinis  iactura  fiat.  Denique  quoad  onera  tyrannidis  commode  ferre  poterimus,  illis  ferendis  nos  obstringit.  Quid  ergo  illa  Pauli  sententia  fiet:  Nemo  vos  iudicet  in  cibo  et  potu  (Coloss.  2,  16)?  Item:  Quid  adhuc  decretis  tenemini  (ibid.  v.  20)?  Item:  State,  et  ne  iterum  subiiciamini  iugo  servitutis  (G-al.  5,  1).  En  reformationis  studium,  quod  tam  fastuose  iactat.  Iam  clausulam  attexens:  Cultus  [pag.  67]  per  se  vitiosos  privatim  posse  caveri  ab  agnoscentibus  vitium:  etsi  videtur  nonnihil  dicere,  maligne  tamen  extenuat  quod  summam  detestationem  meretur.  Quid  enim  si  et  Dei  cultum  sceleste  profanari,  et  fratres  meos  in  exitium  ire  praecipites  videam?  tacitusne  utrumque  patiar?  Haec  scilicet  ratio  est  cur  peccari  admoneat,  si  nimio  superstitionum  odio  ritus  qui  tolerari  possunt,  pro  noxiis  et  impiis  temere  damnentur.  Id  quidem  interdum  contingit:  sed  quid  ad  praesentem  causam,  quum  nemo  abiiciendum  contendat,  nisi  quod  manifesta  impietatis  labe  turpiter  corruptum  est?  [pag.  68]  Porro  si  cui  occulta  sunt  quae  hactenus  iecit  fundamenta,  quorsum  spectaverit,  palam  tandem  demonstrat,  papae  regnum  pro  ecclesia  nobis  obtrudens,  cuius  societas  sancte  inviolabili  iure  colenda  sit.  Unde  statuit,  quibuscunque  impietatum  monstris  scateat  papatus,  qui  tamen  ab  eo  discessionem  fecerunt,  omnes  esse  schismaticos.  Ac  primo  quidem  synonyma  facit  occidentalem  et  romanam  ecclesiam:  ac  si  nulla  in  occidente  quaerenda  esset  ecclesia,  nisi  quae  sub  ditione  papae  se  contineat.  Dictum  suum  confirmat,  quia  in  ea  regeniti  sumus,  eiusque  cives  et  membra  per  baptismum  [pag.  69]  effecti:  deinde  quod  in  ea  retinetur  professio  christiani  nominis,  scripturarum  autoritas,  et  doctrina  illa  apostolica,  quod  ad  capitales  religionis  articulos  attinet:  ad  haec  quod  sacramenta,  ut  sunt  a  Christo  instituta,  illic  serventur  (quamvis  in  eucharistiae  celebratione  et  dispensatione  nonnihil  vitii  videri  possit),  praeterea  quod  in  multarum  caeremoniarum  et  rituum  observatione  illic  adhuc  conspicitur  priscae  ecclesiae  imago:  denique  quod  perpetua  presbyterorum  seu  episcoporum,  quamvis  multum  a  prisca  integritate  degenerantium,  iam  inde  ab  apostolis  [pag.  70]  successione  gubernetur.  Ut  breviter  d  singula  respondeam,  nimis  improbe  ludit  praestigiator  in  ecclesiae  nomine.  Christianismum  prorsus  fuisse  exstinctum  ubicunque  grassata  est  papae  tyrannis,  nemo  unquam  sanus  dixit.  Unde  conficitur,  aliqua  ex  parte  residuam  illic  esse  ecclesiam.  Tantum  quaeritur,  quatenus?  Responsio  nostra  solida  ratione  nititur:  tametsi  ordinarium  baptizandi  ministerium  penes  larvatos  pastores  qui  illic  praesunt,  resideat,  nihilo  tamen  plus  autoritatis  eos  mereri  quam  Cybeles  sacrificos.  Quin  Ierosolyma  vera