48:542  vidit,  et  quae  postea  visurus  est.  Haec  iam  memorabilis  erat  visio,  ex  qua  didicerat  Christum  in  coelo  regnare,  ne  amplius  proterve  illum  contemneret:  sed  agnosceret  Dei  filium  et  promissum  redemptorem.  Alias  postea  revelationes  habuit,  sicuti  recitat  2.  Cor.  cap.  12  (v.  1).  17.  Eripiens  te  a  populo.  Hic  armatur  contra  omnes  metus  qui  eum  manebant:  et  simul  praeparatur  ad  crucis  tolerantiam.  Quum  tamen  mox  subiiciat  venturum  esse  Paulum,  ut  caecos  illuminet,  ut  reconciliet  Deo  qui  alienati  ab  ipso  fuerant,  ac  perditis  salutem  restituat:  mirum  est  cur  non  etiam  fore  promittat,  ut  vicissim  laeti  et  faventes  eum  excipiant  quicunque  tam  praeclaris  beneficiis  fuerint  affecti.  Verum  hic  notatur  mundi  ingratitudo:  quia  vitae  aeternae  ministris  contrariam  prorsus  mercedem  rependat:  sicuti  frenetici  medicos  suos  hostiliter  impetunt.  Et  monetur  Paulus  quocunque  venerit,  magnam  eorum  partem  quibus  prodesse  studebit,  fore  sibi  infestam,  ut  exitium  machinetur.  Diserte  autem  exponit,  se  tam  gentibus  quam  Iudaeis  destinatum  esse  testem,  ne  sibi  vitio  vertatur  quod  utrisque  promiscue  commune  fecit  evangelium.  Nam  hinc  tam  virulentum  odium  in  eum  conceperant  Iudaei,  quod  gentes  sibi  aequari  indigne  ferrent.  Etsi  autem  zelo  id  facere  simulabant,  ne  foedus,  quod  Deus  pepigerat  cum  posteris  Abrahae,  ad  exteros  translatum  profanaretur:  mera  tamen  eos  agebat  ambitio,  quod  soli  eminere,  omnibus  aliis  in  ordinem  coactis,  vellent.  Caeterum  in  unius  hominis  persona  ad  officium  animantur  omnes  pii  doctores,  ne  ipsos  impediat  hominum  malitia,  quominus  Dei  gratiam  miseris  quamlibet  indignis  offerre  pergant.  18.  Ut  aperias  oculos  eorum.  Videtur  Paulus,  quod  Dei  proprium  est  sibi  arrogans,  nimium  se  efferre.  Scimus  enim  non  nisi  a  spiritu  sancto  illuminari  mentis  oculos.  Scimus  Christum  unicum  esse  liberatorem,  qui  nos  a  Satanae  tyrannide  eripit.  Scimus  unum  esse  Deum,  qui  abolitis  peccatis  in  sortem  sanctorum  nos  cooptat.  Sed  hoc  usitatum  est,  ut  Deus  honorem  sibi  uni  debitum  ad  ministros  transferat,  non  ut  quidquam  sibi  deroget,  sed  ut  commendet  quam  in  ipsis  exserit;  spiritus  sui  efficaciam.  Neque  enim  ipsos  ad  opus  mittit,  ut  mortua  sint  organa,  vel  quasi  fabulae  actores:  sed  ut  potenter  operetur  per  ipsorum  manum.  Caeterum,  quod  efficax  est  eorum  praedicatio,  ab  arcana  eius5)  virtute  pendet,  qui  agit  omnia  in  omnibus  et  solus  dat  incrementum.  Mittuntur  ergo  doctores,  non  qui  frustra  verba  in  aerem  spargant,  vel  qui  aures  duntaxat  inani  sonitu  feriant:  sed  qui  vivificam  lucem  caecis  afferrant,  reforment  in  Dei  iustitiam  hominum  corda,  et  ratam  faciant,  quae  Christi  morte  parta  est,  salutis  gratiam.  Sed  horum  nihil  *)  Dei.