5:540  faict  par  l'Esprit  de  regeneration  d'enfant  d'ire,  enfant  de  Dieu  (Tite  3,  6):  mourir  et  estre  ensepvely  avec  Christ,  et  avec  iceluy  ressusciter  en  renouvellement  de  vie,  estans  faictz  participans  [fol.  33]  de  sa  mort  et  de  sa  resurrection,  commenceans  en  nous  une  vie  nouvelle,  et  ce  non  par  nostre  force,  ains  par  la  vertu  divine,  par  laquelle  aussi  il  est  ressuscite.  Or  le  Baptesme  donne  iustification  et  d'icelle  nous  rend  entierement  asseurez  :  ainsi  que  tesmoingne  l'Apostre  S.  Paul:  Quiconque  (dit-il)  estes  baptizez  en  Christ,  vous  avez  vestu  Christ  (G-al.  3,  27).  Ceste  vertu  du  Baptesme  nous  doit  revenir  en  memoire,  et  estre  exercee  tout  le  temps  de  nostre  vie,  a  celle  fin  que  l'homme  Chrestien  meure  a  cestuy  usage  mortel,  et  qu'en  renonceant  au  monde  et  au  Diable,  il  renonce  a  soymesme,  respirant  en  Dieu  et  en  iceluy  meditant  nouvelle  vie,  iusque  a  ce,  que  ce  corps  mortel  reveste  immortalite:  et  que  la  chair  ensepvelye  par  infirmite  ressuscite  en  gloire  (1  Cor.  15,  53).  Car  le  Baptesme  est  le  gage  et  representation  de  la  resurrection:  non  seulement  spirituelle,  mais  aussi  de  celle  de  la  chair,  qui  est  future.  Comme  sainct  Ambroyse  monstre  sur  le  sixiesme  chapitre  des  Romains.  IL  fault  aussi  enseigner,  que  l'Eglise  a  receu  commandement  des  Apostres,  touchant  le  Baptesme  des  enfans:  et  que  non  seulement  la  grace  est  necessaire  a  salut,  pour  ceux  qui  sont  en  eage,  ains  aussi  pour  les  petiz,  entant  qu'en  iceux  sont  les  souilleures  naturelles  de  peche  qui  doivent  estre  abolies  par  l'eaue  et  Esprit.  Selon  ce  dict  de  l'Evangile:  Si  aucun  n'est  regenere  d'eaue  et  d'Esprit  etc.  Il  est  aussi  tout  notoire,  que  a  iceux  appartient  la  promesse  de  l'Evangile,  laquelle  ne  peult  aucunement  appartenir  a  ceux  qui  ne  sont  receuz  en  l'Eglise,  que  par  le  Baptesme.  Parquoy  ces  estourdiz  Anabaptistes  sont  a  condamner,  qui  n'approuvent  point  le  Baptesme  des  petiz:  affermans  qu'iceux  sans  le  Baptesme  peuvent  estre  sauvez.  Du  Sacrement  de  Confirmation.  Apres  le  Baptesme  s'ensuyt  le  Sacrement  de  Confirmation:  lequel  encor  qu'il  ne  soit  de  necessite  a  salut:  toutesfoys  il  est  fonde  sur  la  parolle  de  Dieu:  par  laquelle  est  promis,  que  le  [fol.  34]  Pere  donnera  son  S.  Esprit,  a  ceux  qui  Ten  requerront.  Or  l'element  est  l'imposition  des  mains:  a  laquelle,  mesme  du  temps  des  Apostres,  le  S.  Esprit  sensiblement  descendoit  sur  les  fideles.  Puis  apres  que  ce  don  special  de  diversite  des  langues  n'estoit  ia  plus  necessaire  pour  confirmer  la  foy,  entant  que  l'Eglise  estoit  amplifiee,  toutesfoys  l'imposition  des  mains  demoura,  et  aussi  par  authorite  Ecclesiastique,  le  signe  d'unction  a  este  adioinct,