48:540  blasphemare,  et  amplius  insaniens  in  eos,  persequebar  etiam  in  exteras  usque'civitates.  12.  Quarum  rerum  studio  quum  irem  Damascum  cum  autoritate  et  permissu  principum  sacerdotum:  13.  die  medio,  rex,  in  via  vidi  e  coelo  supra  splendorem  solis  lumen  me  circumfulgens  et  eos,  qui  mecum  faciebant  iter.  14.  Quum  autem  omnes  nos  decidissemus  in  terram,  audivi  vocem  loquentem  ad  me,  et  dicentem  hebraica  lingua:  Saul,  Saul,  quid  me  persequeris?  Durum  est  tibi  contra  stimulos  calcitrare.  15.  Ego  autem  dixi:  Quis  es,  Domine?  At  ille  dixit:  Ego  sum  Iesus,  quem  tu  persequeris.  16.  Sed  exsurge  et  sta  super  pedes  tuos:  ad  hoc  enim  apparui  tibi,  ut  constituam  te  ministrum  ac  testem  et  eorum  quae  vidisti,  et  eorum  in  quibus  apparebo  tibi,  17.  eripiens  te  a  populo  et  gentibus,  ad  quas  nunc  te  mitto,  18.  ut  aperias  oculos  eorum,  ut  convertantur  a  tenebris  ad  lucem,  et  a  potestate  Satanae  ad  Deum,  ut  accipiant  remissionem  peccatorum  et  sortem  inter  sanctificatos,  per  fidem,  quae  est  in  me.  9.  Et  ego  quidem.  Nisi  plura  dixisset  Paulus  quam  hactenus  recensuit  Lucas,  abrupta  esset  oratio.  Unde  conficitur  quod  prius  dixi,  quum  mentionem  foederis  Dei  fecisset,  de  Christi  officio  et  gratia  disseruisse,  ut  res  ferebat.  Ideo  autem  conversionis  suae  historiam  repetit,  non  tantum  ut  levitatis  notam  a  se  removeat:  sed  ut  divinitus  se  vocatum  testetur,  adeoque  coelesti  mandato  coactum.  Nam  quod  praeter  animi  propositum  repente  ex  lupo  in  ovem  conversus  est,  tam  violenta  mutatio  non  parum  valet  ad  conciliandam  doctrinae  eius  fidem.  Ideo  amplificat  illum  nocendi  ardorem,  quo  ferebatur  adversus  Christi  membra,  et  pertinaciam  cui  penitus  addictus  erat.  Si  a  prima  pueritia  imbutus  esset  Christi  fide,  vel  ab  homine  aliquo  edoctus,  sponte  illam  et  sine  repugnantia  amplexus  foret:  illi  quidem  privatim  certa  fuisset  sua  vocatio,  sed  apud  alios  minus  illustris.  Nunc  vero  quum  obstinato  et  inflexibili  furore  ardens,  non  occasione  aliqua  adductus,  nec  persuasus  ab  homine  mortali,  novam  mentem  induerit:  manu  Dei  subactum  fuisse  apparet-  Magnum  ergo  pondus  habet  ista  antithesis,  quod  se  prava  confidentia  elatum  fuisse  commemorat,  ut  se  putaret  Christi  fore  victorem:  qua  docere  voluit  nihil  minus  quam  ex  animi  sui  sensu,  Christi  se  discipulum  esse  factum.  Nomen  Iesu  Nazareni  pro  tota  evangelii  professione  hic  accipitur,  quam  exstinguere  statuerat  Paulus,  hoc  modo  bellum  adversus  Deum  inscienter  suscipiens.  10.  Quod  et  feci  Ierosolymis.  Ab  ipsis  factis  probat  quanto  zeli  impetu  abreptus  fuerit  ad  oppugnandum  Christum,  donec  maior  vis  retraxit,  ut  cursum  in  oppositam  partem  flecteret.  Porro  huius  vehementiae  testes  habebat  suos  adversarios,  ut  certo  constaret  subito  fuisse  mutatum.  Nec  vero