40:540  cuiusque.  Daniel  ergo  potuit  discere  artes  illas,  hoc  est,  astrologiam,  et  alias  liberales  scientias:  quemadmodum  Moses  etiam  dicitur  fuisse  edoctus  in  omni  scientia  aegyptiaca.  Scimus  autem  Aegyptios  fuisse  infectos  similibus  corruptelis.  Sed  tam  de  Mose  quam  de  propheta  nostro  hoc  dici  potest,  fuisse  imbutos  astrologia  et  aliis  liberalibus  scientiis.  Quanquam  incertum  est,  an  rex  iusserit  etiam  illos  longius  progredi.  Sed  hoc  tenendum  est  quum  Daniel  abstinuerit  (quemadmodum  statim  videbimus)  a  cibo  et  potu  regio,  non  fuisse  abductum,  ut  se  involveret  illis  Satanae  imposturis.  Constituo  igitur,  quidquid  rex  mandaverit,  Danielem  fuisse  contentum  pura  et  genuina  scientia  rerum  naturalium.  Quod  ad  regem  spectat  (sicuti  iam  dictum  fuit)  voluit  suae  utilitati  privatim  consulere,  ut  Daniel  et  socii  eius  transirent  in  alienam  gentem,  et  deficerent  a  populo  suo,  quasi  nati  essent  in  Chaldaea.  Iam  sequitur,  5.  Et  constituit  illis  rex  demensum  (121,  rem)  diei  in  die  suo  (hoc  est,  pro  uno  quoque  die)  ex  frusto  (ad  verbum,  sed  portionem  hic  significat:  ex  portione)  cibi  regis,  et  ex  vino  potus  eius.  Et  ut  educarentur  annis  tribus:  et  a  fine  illorum  (quidam  vertunt  ex  parte  illorum,  hoc  est,  ut  ipsorum  pars  aliqua:  sed  non  dubium  est  quin  hic  spatium  illud  temporis  designet  propheta,  quemadmodum  postea  videbimus.  Ut  ergo  a  fine  temporis)  starent  coram  rege.  Hoc  etiam  versu  ostendit  Daniel,  regem  quos  sibi  adduci  iusserat  ex  Iudaea,  sic  aluisse,  ut  eos  inebriaret  suis  delitiis,  atque  ita  oblivionem  induceret  propriae  gentis.  Scimus  enim  sicubi  ullae  sint  astutiae  in  mundo,  maxime  regnare  in  aulis  principum.  Nebuchadnezer  ergo  quum  videret  sibi  negotium  esse  cum  gente  praefracta  (ut  scimus  Iudaeos  fuisse  duro  et  fere  indomito  ingenio)  voluit  sibi  acquirere  famulos,  qui  sponte  essent  obsequentes:  et  ideo  studuit  demulcere  eos  blanditiis.  Haec  igitur  fuit  ratio  cur  praescripserit  illis  demensum  ex  portione  cibi  et  potus  sui.  Quemadmodum  hodie  etiam  ille  est  summus  honor  in  aulis  principum,  d'estre  servi  de  la  bouche,  ut  dicunt.  Voluit  igitur  Nebuchadnezer  et  Danielem  et  socios  eius  ali  non  modo  splendide,  sed  etiam  regaliter,  quasi  essent  ex  genere  regio:  tamen  essent  captivi  et  exsules.  Abduxerat  enim  ipsos  violenter  e  patria,  et  pro  iure  victoris,  quemadmodum  heri  diximus.  Itaque  non  facit  hoc  liberalitatis  causa,  ut  debeat  censeri  in  ipso  virtus,  quod  aluerit  ex  suo  cibo  et  potu  miseros  istos  exsules,  sed  astute  (quemadmodum  diximus)  conciliat  sibi  animos  puerorum,  ut  malint  inter  Chaldaeos  censeri,  quam  inter  Iudaeos,  atque  ita  genus  suum  abnegent.  Fuit  quidem  hoc  con-