32:540  luy  establisse  sa  parole,  voire  adioustant  qu'il  est  a  la  crainte  de  Dieu,  il  conferme  les  requestes  qu'il  avoit  faites  cy  dessus.  Or  nous  devons  tousiours  avoir  cest  article  en  memoire,  quand  il  est  question  de  prier  Dieu,  que  nous  soyons  fondez  sur  ses  promesses.  Que  nous  ne  luy  demandions  rien,  sinon  que  desia  nous  soyons  asseurez  qu'il  nous  le  veut  donner,  et  qu'il  l'a  promis  de  son  bon  gre,  sans  en  estre  requis.  Car  ce  seroit  une  folle  temerite  aux  hommes  de  se  presenter  a  Dieu,  et  faire  une  demande  a  leur  appetit:  mais  il  faut  que  Dieu  nous  aii  prevenu  et  qu'il  ait  parle  le  premier.  Sur  cela  donc  nous  pouvons  estre  asseurez  pour  le  prier  quand  nous  avons  sa  Parole.  Suyvant  laquelle  raison  David  apres  avoir  fait  les  requestes  que  nous  avons  ouyes,  adiouste,  Seigneur,  estably  ta  parole  a  ton  serviteur.  Comme  s'il  disoit,  Seigneur,  ie  ne  demande  rien  sinon  ce  que  tu  m'as  promis.  Et  voyla  qui  me  donne  une  telle  hardiesse  de  venir  a  toy,  scachant  que  tu  es  fidele,  et  que  tu  me  feras  comme  tu  m'as  promis.  Parquoy  comme  les  promesses  de  Dieu  doyvent  donner  l'entree  en  nos  prieres,  et  aller  tousiours  devant:  aussi  apres  que  nous  l'aurons  prie,  reduisons  en  memoire  ses  mesmes  promesses,  afin  d'estre  asseurez  que  ce  ne  sera  point  en  vain  que  nous  le  requerrons.  Pourquoy?  d'autant  que  Dieu  s'est  oblige  a  nous  de  son  bon  gre,  il  n'y  a  nulle  doute  que  nous  ne  serons  point  frustrez,  attendans  qu'il  accomplisse  ce  qu'il  a  dit:  car  il  ne  nous  peut  faillir.  Voyla  donc  ce  qui  est  du  commencement  de  ce  verset.  Or  quand  David  dit  qu'il  est  a  la  crainte  de  Dieu,  ce  n'est  pas  qu'il  luy  vueille  yci  alleguer  ses  merites:  mais  c'est  pour  monstrer  qu'il  a  suyvi  la  vocation  en  laquelle  il  estoit  appelle:  et  neantmoins  il  declare  qu'il  ne  pouvoit  pas  cheminer  en  la  crainte  de  Dieu,  sinon  par  Ja  vertu  de  son  sainct  Esprit,  cela  luy  estoit  en  usage.  Et  ainsi  nous  en  faut-il  faire.  Que  si  nous  avons  quelque  bon  zele  en  nous,  il  ne  faut  pas  nous  en  glorifier.:  car  qu'est-ce  qu'il  y  a  du  nostre:  comme  dit  sainct  Paul.  Qui  est-ce  qui  nous  separe,  que  nous  ne  soyons  pareils  aux  plus  meschans?  cela  vient  il  de  nostre  nature?  il  est  bien  certain  que  non.  Il  faut  donc  que  Dieu  y  ait  mis  la  main.  Et  ainsi,  autant  de  bien  qu'il  y  a  en  nous,  ce  nous  est  tesmoignage  de  la  bonne  volonte  que  Dieu  nous  porte,  et  qu'il  veut  estre  nostre  pere  et  Sauveur.  Voyla  pourquoy  David  met  cecy  en  avant,  comme  s'il  se  vouloit  ratifier  les  promesses  de  Dieu.  Or  il  conclud,  Oste  l'opprobre  que  i'ay  craint,  car  tes  ordonnances  sont  bonnes.  Voyci  fay  desire  tes  commandemens}  vivifie  moy  en  ta  iustice.  Nous  ne  scaurons  pas  quel  est  l'opprobre  duquel  parle  David,  sinon  que  nous  regardions  a  quoy  il  a  tendu  par  cy  devant,  et  quel  est  encores  son  but:  c'est