8:54  (1  Ioann.  3,  3).  Ad  hanc  sanctitatem  qui  non  aspirant,  quum  sciamus  eos  falso  Christi  nomen  obtendere,  quid  est  cur  nos  sua  pravitate  impediant  ac  morentur?  Est  quidem  panis  vitae  evangelium:  sed  multum  abest,  quin  ab  omnibus  concoquatur:  quum  ex  multis,  qui  avide  illud  deglutire  videntur,  pauci  eius  gustum  percipiant.  Denique,  quando  areae  Christus  ecclesiam  suam  comparat,*)  ubi  sic  paleae  mixtum  est  triticum,  ut  sub  ea  obrutum  magna  ex  parte  lateat,  non  extraneos  facit  paleae  similes,  sed  qui  falsa  evangelii  professione  locum  inter  pios  occupant.  Quorsum  etiam  testatus  foret,  se  multos  ultimo  die  non  agniturum,  qui  et  praecones  se  fuisse  evangelii  iactabunt,  et  miracula  a  se  edita  obiicient  (Matth.  7,  22):  nisi  quia  saeculis  omnibus  tales  aliquos  exstare  necesse  est?  Fit  etiam  interdum,  ut  qui  Deum  alioqui  ex  animo  timent,  vel  saltem  non  omnino  sunt  reprobi,  in  foedum  aliquod  facinus  prolapsi,  et  se,  et  quam  sequuntur  puram  religionem,  dedecore  afficiant.  Quantum  fuit  illud  Davidis  flagitium,  quum  suae  libidini  indulgens,  ut  alienam  uxorem  raperet,  non  modo  unius  hominis  de  se  bene  meriti  innoxium  fudit  sanguinem,  sed  totum  Dei  populum,  quantum  in  se  erat,  exitio  tradidit?  Si  colligere  huius  generis  scandala  libeat,  quae  heroicos  homines  concutere  poterant,  quae  domi  suae  vidit  scelerum  portenta  sanctus  patriarcha  Iacob?  Postquam  eius  filiae  vis  est  allata:  Simeon  et  Levi  non  minus  barbara  saevitia  quam  nefanda  proditione  Sichimitas  trucidant.  Caedibus  imbuti  eius  filii  in  fratricidium  conspirant.  Accedit  tandem  ad  malorum  cumulum  incestus  primogeniti  cum  noverca  concubitus.  Et  tamen  in  una  domo  tunc  inclusa  [pag.  68]  erat  Dei  ecclesia.  A  recitandis  pluribus  exemplis  abstineo.  Hodie  vero  pauca  scandala  lynceis  oculis  disquirent  nonnulli,  ne  quid  cum  tota  Dei  ecclesia,  quaquaversum  patet,  commune  habeant.  Uno  hoc  exemplo  contentus  sum  lectores  monuisse:  fidem  nimis  fore  instabilem,  si  ad  singulas  hominum  ruinas  subinde  labascat.  Interea  illud  tenendum  est  axioma:  certo  Dei  consilio  fieri,  ut  semper  bonis  mali  permixti  sint.  Hoc  modo  tum  fidei  probatur  constantia,  tum  ad  patientiam  exercemur,  tum  accenditur  precandi  studium,  tum  spinarum  punctiones  ad  caute  prudenterque  ambulandum  nos  sollicitant,  tum  mundi  contemptus  oboritur,  et  una  cum  migrandi  desiderio  coelestis  vitae  meditatio  crescit.  Quod  si  causa  lateat,  his  tamen  exercitiis  constare  sciamus  militiae  nostrae  partem,  quae  toto  vitae  curriculo  nobis  colenda  est.  Multum  etiam  nocet,  quae  vulgo  cernitur  in  plerisque  levitas.  Quum  principio  mirum  fervorem  ostentent,  ita  mox  evaniscet  flamma  illa,  ut  ex  stupa  1)  Mar  go  laudat  Luc.  3,  17.