52:54  conscientia  Deum  quaerere,  nihil  arrogare  sibi,  placide  subiicere  suum  sensum  Christo.  Nam  in  Pauli  imitatione  continentur  omnes  illae  virtutes:  rectus  zelus,  timor  domini,  modestia,  sui  abnegatio,  docilitas,  amor  et  studium  concordiae.  Simul  autem  iubet  esse  imitatores  sui,  hoc  est,  omnes  uno  consensu  et  una  mente.  Nota  metam  perfectionis,  ad  quam  Philippenses  invitat  suo  exemplo,  esse  ut  idem  sentiant  et  eadem  progrediantur  regula.  Sed  ante  posuit  doctrinam  in  qua  consentire  et  regulam  ad  quam  se  formare  debeant.  17.  Considerate  eos.  Hoc  verbo  significat,  sibi  perinde  esse  quos  sibi  deligant  ad  imitandum,  modo  se  forment  ad  illam  puritatem  cuius  ipse  erat  exemplar.  Quo  tollitur  omnis  ambitionis  suspicio,  socios  enim  refugit,  quisquis  sibi  addictus  est.  Et  simul  admonet,  non  esse  omnes  promiscue  imitandos:  quemadmodum  clarius  subiungit.  18.  Multi  enim  ambulant  (quos  saepe  dicebam  vobis,  ac  nunc  etiam  flens  dico,  inimicos  esse  crucis  Christi:  19.  quorum  finis  perditio,  quorum  deus  venter  est,  et  gloria  in  confusione  ipsorum)  terrena  cogitantes.  20.  Nostra  autem  conversatio  in  coelis  est,  ex  quibus  etiam  salvatorem  exspectamus,  dominum  Iesum  Christum:  21.  qui  transformabit  corpus  nostrum  humile,  ut  sit  conforme  corpori  suo  glorioso,  secundum  efficaciam,  qua  potest  etiam  sibi  subiicere  omnia.  18.  Multi  enim.  Ista  est  propositio  simplex  (meo  quidem  iudicio).  Multi  ambulant  terrena  cogitantes.  Qua  significat  multos  esse  qui  humi  repunt,  non  sentientes  vim  regni  Dei.  Notas  autem  inseruit  quibus  tales  discerni  queant,  quas  suo  loco  excutiemus.  Quidam  per  terrestria  intelligunt  caeremonias  et  externa  mundi  elementa,  quae  oblivionem  inducunt  verae  pietatis.  Sed  ego  ad  carnalem  affectum  referre  malo:  quod  scilicet  Dei  spiritu  non  regeniti  nihil  nisi  mundum  sapiant.  Quod  ex  sequentibus  clarius  patebit.  Nam  invidiam  hinc  illis  constat^  quod  sui  tantum  honoris,  otii  et  quaestus  cupidi,  ecclesiae  aedificationem  negligerent.  Quos  saepe  dicebam.  Ostendit  quam  non  abs  re  saepius  monuerit  Philippenses,  quia  nunc  eadem  per  literas  cogatur  reducere  in  memoriam,  quae  prius  coram  dixerat.  Et  lacrymae  argumento  sunt,  non  aemulatione  vel  odio  hominum,  non  maledicendi  cupiditate,  non  ingenii  petulantia  eum  impelli,  sed  pio  zelo:  quia  videat  misere  ecclesiam  perdi  ab  eiusmodi  pestibus.  Ita  scilicet  nos  affici  convenit,  ut  dum  cernimus  ab  improbis  et  nihili  hominibus  pastorum  locum  occupari,  gemamus  et  saltem  lacrymis  testemur,  nos  ecclesiae  calamitati  condolescere.  Operae  pretium  etiam  est  notare  de  quibus  agat  Paulus:  non  de  apertis  scilicet  hostibus,  qui  ex  professo  doctrinam  eversam  cuperent:  sed  da