40:54  in  hac  figura:  sed  addendum  est  simul  quod  dicitur  Ioannis  12.  cap.  (v.  41)  nempe  quum  Isaias  vidit  Deum  sedentem  in  solio,  vidisse  gloriam  Christi,  et  de  ipso  fuisse  loquutum.  Itaque  quod  iam  citavi  ex  veteribus,  aptissime  convenit,  quoties  apparuit  Deus  sub  hominis  specie,  ita  specimen  aliquod  obscurum  dedisse  mysterii,  quod  tandem  manifestatum  fuit  in  Christi  persona.  Interim  procul  abigenda  sunt  deliria  Serveti,  qui  facile  etiam  refellitur  prophetae  verbis.  Contendit  enim  hanc  similitudinem  hominis  fuisse  essentialem:  et  tunc  Christum  fuisse  figurativum  filium,  quia  erat  Deus  visibilis,  inquit,  compositus  ex  tribus  elementis  increatis.  Sunt  plus  quam  detestabiles  blasphemiae,  et  indignae  quae  refutentur:  tamen  quia  fascinavit  impius  ille  nebulo  multos  leves  homines,  et  qui  meritas  poenas  dederunt  stultae  curiositatis,  ideo  utile  est  attingere  tantum  in  transcursu  illos  errores.  Fingit  ergo  Christum  fuisse  visibilem  Deum  a  creatione  mundi  :  et  hoc  modo  interpretatur  fuisse  imaginem  Dei.  In  patre  non  agnoscit  ullam  personam,  sed  dicit  patrem  esse  Deum  invisibilem,  Christum  vero  quatenus  est  patris  imago,  esse  simul  personam.  Iam  dicit  ex  tribus  elementis  illis  increatis  esse  conflatum.  Si  diceret  ex  tribus  elementis  duntaxat,  Christus  non  esset  Deus:  sed  fingit  sibi  elementa  increata  quae  originem  ducunt  ab  essentia  Dei.  Haec  vero  elementa  dicit  sic  fuisse  digesta,  ut  habuerint  hominis  formam:  ita  non  dicit  Christum  apparuisse  in  forma  hominis  duntaxat,  sed  dicit  Christum  fuisse  hominem  figuratum  in  illa  essentia  divina.  Tandem  dicit  Christum  factum  fuisse  hominem  ex  semine  Abrahae,  quia  ad  tria  illa  elementa  accessit  etiam  quartum,  quod  fatetur  creatum  esse:  ita  dicit  Christum  fuisse  hominem,  quia  imaginatur  massam  confuso  modo  ex  illa  deitate  visibili  et  ex  semine  Abrahae  conflatam.  Christus  ergo  secundum  ipsum  fuit  homo  ad  tempus,  quia  commixtus  fuit  Deus  ille  visibilis  cum  carne.  Iam  autem  dicit  carnem  Christi  absorptam  fuisse  a  deitate  :  et  sicuti  Deus  factus  fuit  homo  non  unione  sed  confusione,  ita  nunc  dicit  hominem  fuisse  deificatum  et  carnem  illam  Christi  esse  unius  essentiae  cum  Deo:  et  proinde  nihil  habere  humanum.  Ideo  nos  deridet,  qui  docemus  non  posse  nos  participes  esse  Christi,  nisi  fide  in  coelum  conscendamus:  quia  fingit  corpus  eius  esse  ubique  et  immensum.  Quare?  Deificatum  est,  inquit,  neque  retinet  ullum  vestigium  humanae  naturae.  Videmus  nunc  cuiusmodi  monstra  ille  impostor  fabricaverit.  Sed  propheta  noster  discutit  tales  nebulas,  quum  dicit  apparuisse  quasi  similitudinem  adspectus  hominis.  Distinctius  apud  Danielem  nobis  describitur  solium  Dei,  quia  adducitur  ad  Antiquum  dierum  homo,  qui  gestabat  saltem  hominis  figuram.  Illic  ergo  statuitur  Deus  in  summo  gradu,  deinde  adiun-  4*