33:54  este  institue:  qu'ils  ne  ferment  point  les  yeux,  pour  faire  semblant  de  ne  voir  goutte,  quand  il  y  aura  quelque  faute  commise:  mais  qu'ils  ayent  tousiours  la  medecine  preservative  en  main:  que  les  Ministres  de  la  Parole  n'attendent  pas  que  tout  soit  deprave,  et  que  le  diable  ait  la  vogue:  mais  si  tost  qu'ils  appercoivent  qu'il  y  a  quelque  bresche,  et  que  les  choses  ne  suivent  pas  un  bon  train,  qu'ils  taschent  d'y  remedier  le  plustost  qu'il  leur  sera  possible,  afin  que  les  choses  n'aillent  point  en  empirant  comme  elles  ont  de  coustume.  Or  maintenant  il  s'ensuit  que  Iob  disoit:  Possible  mes  enfans  auront  peche,  et  auront  benit  Dieu.  Il  y  a  ainsi  de  mot  a  mot,  mais  le  mot  de  Benir,  se  prend  aucunesfois  pour  Maudire:  comme  quand  il  est  dit,  que  Naboth  avoit  benit  Dieu  et  le  Roy,  c'est  a  dire,  maudit.  Et  nous  en  verrons  encores  ci  apres  de  tels  exemples,  et  exposerons  plus  amplement,  comme  ce  mot  a  este  mis  en  deux  significations  contraires.  Mais  devant  que  venir-la,  notons  ce  qui  est  ici  dit  au  texte,  que  Iob  disoit:  Possible  mes  enfans  auront  peche.  Ici  nous  voyons  que  Iob  n'a  pas  attendu  que  Dieu  luy  envoyast  quelque  message  pour  le  menacer,  a  cause  des  pechez  de  ses  enfans,  mais  qu'il  a  prevenu  et  qu'il  s'est  sollicite  sans  que  personne  l'incitast,  disant:  Possible  que  mes  enfans  auront  failli.  Or  c'est  un  poinct  que  nous  devons  bien  observer:  car  auiourd'huy  il  y  en  a  bien  peu  qui  puissent  souffrir  qu'on  les  admoneste,  et  que  leurs  fautes  leur  soyent  remonstrees:  combien  que  leurs  vices  soyent  notoires  en  tout  et  par  tout,  si  est-ce  qu'ils  trouveront  le  moyen  (s'il  leur  est  possible)  de  s'excuser,  et  de  se  couvrir  :  mesmes  quand  on  voudra  reprendre  ceux  qui  ont  failli,  il  se  faut  apprester  a  soustenir  une  guerre  mortelle  tellement  qu'on  sera  ennemi  capital  de  ceux  desquels  on  procurera  le  salut.  Or  si  les  hommes  ne  peuvent  endurer  qu'on  les  redargue  quand  ils  auront  failli,  comment  d'eux-mesmes  et  de  leur  bon  gre  se  condamneront-ils,  pour  se  redarguer,  et  dire,  Possible  que  i'ai  commis  une  telle  faute,  ou  moy,  ou  les  miens?  Or  nous  voyons  ici  que  Iob  a  tousiours  pense  en  soy,  Possible  que  tes  enfans  auront  peche.  Et  ainsi  donc  le  S.  Esprit  nous  declare  quel  est  nostre  office:  c'est  assavoir,  que  quand  nous  aurons  apperceu  que  nous  sommes  tous  coulpables  de  condamnation,  un  chacun  se  doit  picquer  et  aiguillonner  pour  se  faire  son  procez  de  son  bon  gre.  Par  plus  forte  raison  quand  Dieu  nous  fait  ceste  grace  de  nous  soliciter,  et  que  nous  avons  gens  qui  nous  exhortent  a  faire  nostre  devoir,  si  sur  cela  nous  sommes  rebelles  a  Dieu  quand  il  nous  envoye  de  tels  messagers,  il  est  certain  (di-ie)  que  si  nous  ne  souffrons  d'estre  redarguez  par  eux,  ce  n'est  point  aux  creatures  mortelles  que  nous  nous  addressons,  mais  nous  nous  4*