32:54  PSALMUS  C.  ARG.  Inscriptio  vice  argumenti  sufficere  nobis  debet:  deinde  ipsa  brevitas  longiorem  sermonem  non  postulat.  Fideles  autem  proprie  ad  Deum  laudandum  invitat,  quod  eos  sibi  elegerit  in  populum,  et  in  suam  curam  susceperit.  Psalmus  ad  laudandum.  1.  Exsultate  Iehovae  omnis  terra.  2.  Servite  Iehovae  in  laetitia:  venite  in  conspectum  eius  in  exsultatione.  3.  Cognoscite  quod  Iehova  ipse  est  Deus:  ipse  fecit  nos,  et  non  ipsi  nos:  populus  eius,  et  grex  pascuorum  eius.  1.  (Exsultate.)  Partem  duntaxat  cultus  Dei  attingit,  quae  in  reputandis  eius  beneficiis  et  gratiarum  actione  sita  est.  Quia  autem  promiscue  compellat  totam  terram,  videtur  spiritu  prophetico  ad  tempus  respexisse  quo  ex  variis  gentibus  colligenda  erat  ecclesia.  Iubet  igitur  in  laetitia  Deum  coli:  significans  ita  beneficum  esse  erga  suos,  ut  largam  gaudii  materiam  eis  suppeditet.  Quod  melius  tertio  versu  exprimit,  ubi  primo  hominum  audaciam  castigat  qui  sibi  et  plures  deos  et  multiplices  eorum  cultus  fingendo  perperam  a  vero  Deo  desciverant.  Quoniam  ergo  deorum  turba  obruit  ac  sepelit  veram  unius  Dei  notitiam,  eiusque  gloriam  lacerat:  merito  admonet  propheta  cunctos,  mortales,  ut  ad  sanam  mentem  reversi  Deum  suo  honore  spoliare  desinant:  et  eorum  amentiam  coarguit,  quod  non  contenti  uno  Deo,  in  suis  cogitationibus  evanescant.  Nam  utcunque  verbo  fateri  cogantur  omnes,  esse  aliquem  Deum  coeli  et  terrae  opificem,  mox  tamen  eius  gloriam  huc  et  illuc  distrahunt.  Atque  hoc  modo  ipsa  divinitas,  quantum  in  ipsis  est,  redigitur  in  nihilum.  Quum  ergo  res  ardui  negotii  sit,  retinere  homines  in  puro  Dei  cultu,  non  abs  re  a  consueta  vanitate  propheta  mundum  revocans,  cognoscere  iubet  quod  Deus  sit  Deus.  Tenenda  enim  est  brevis  eius  notitiae  definitio,  dum  scilicet  ei  integrum  relinquitur  ius  suum,  nec  opponitur  ulla  deitas  quae  eius  nomen  obscuret.  In  papatu  quidem  relinquitur  ei  suum  nomen  :  quia  tamen  eius  gloria  in  duabus  syllabis  minime  inclusa  est,  certum  est  pro  Deo  non  agnosci.  Sciamus  ergo  non  stare  rectum  Dei  cultum,  donec  correcta  fuerit  impia  gloriae  eius  profanatio  quam  superstitiones  secum  afferunt.  Postea  singulare  eius  beneficium  praedicat,  in  quo  reputando  fideles  praecipue  suam  operam  vult  consumere.  Videtur  quidem  hoc  esse  nimis  vulgare,  quod  Deus  nos  fecerit:  sed  ut  taceam  de  communi  ingratitudine,  quod  vix  centesimus  quisque  serio  vitam  suam  Deo  acceptam  refert,  quamvis  dum  urgentur,  non  negent  se  de  nihilo  creatos  esse,  quisque  tamen  sibi  Deus  ost,  et  se  ipsum  adorat,  dum  arrogant  omnes  suis  viribus  4*