2:54  [CO  2.54]  etiam  redemptor  in  mediatoris  persona.  Caeterum  quia  nondum  ad  mundi  lapsum  et  naturae  corruptionem  ventum  est,  de  remedio  etiam  tractare  supersedeo.  Meminerint  ergo  lectores,  me  nondum  de  foedere  illo  disserere,  quo  sibi  Deus  adoptavit  Abrahae  filios,  et  de  illa  doctrinae  parte  qua  proprie  segregati  semper  fuerunt  fideles  a  profanis  gentibus,  quia  in  Christo  fundata  fuit;  sed  tantum  quomodo  ex  scriptura  discere  conveniat,  Deum,  qui  mundi  creator  est,  certis  notis  ab  omni  commentitia  deorum  turba  discerni.  Opportune  deinde  series  ipsa  ad  redemptionem  nos  deducet.  Quanquam  autem  multa  ex  novo  testamento  testimonia  adhibebimus,  alia  etiam  ex  lege  et  prophetis,  ubi  expressa  fit  Christi  mentio;  in  hunc  tamen  finem  tendent  omnia,  Deum  mundi  opificem  nobis  patefieri  in  scriptura,  et  quid  de  eo  sentiendum  sit  exponi,  ne  per  ambages  incertum  aliquod  numen  quaeramus.  [Inst  1.6.2.]  Sive  autem  per  oracula  et  visiones  patribus  innotuit  Deus,  sive  hominum  opera  et  ministerio  suggessit  quod  deinde  per  manus  posteris  traderent,  indubium  tamen  est  insculptam  fuisse  eorum  cordibus  firmam  doctrinae  certitudinem,  ut  persuasi  essent  atque  intelligerent,  a  Deo  profectum  esse  quod  didicerant.  Semper  enim  Deus  indubiam  fecit  verbo  suo  fidem,  quae  omni  opinione  superior  esset.  Tandem  ut  continuo  progressu  doctrinae  veritas  saeculis  omnibus  superstes  maneret  in  mundo,  eadem  oracula  quae  deposuerat  apud  patres,  quasi  publicis  tabulis  consignata  esse  voluit.  Hoc  consilio  lex  promulgata  fuit,  cui  postea  interpretes  additi  sunt  prophetae.  Etsi  enim  multiplex  fuit  legis  usus,  ut  melius  videbitur  suo  loco,  praesertim  vero  Mosi  et  omnibus  prophetis  propositum  fuit,  modum  reconciliationis  inter  Deum  et  homines  docere,  unde  etiam  Paulus  (Rom.  10,  4)  Christum  vocat  finem  legis;  iterum  tamen  repeto,  praeter  doctrinam  fidei  et  poenitentiae  propriam,  quae  Christum  mediatorem  proponit,  scripturam  unicum  et  verum  Deum  quatenus  mundum  creavit  et  gubernat,  certis  notis  et  insignibus  ornare,  ne  misceatur  cum  falsa  deorum  turba.  Ergo  quamvis  hominem  serio  oculos  intendere  conveniat  ad  consideranda  Dei  opera,  quando  in  hoc  splendidissimo  theatro  locatus  est  ut  eorum  esset  spectator,  aures  tamen  praecipue  arrigere  convenit  ad  verbum,  ut  melius  proficiat.  Ac  proinde  mirum  non  est,  magis  ac  magis  in  stupore  suo  obdurescere  qui  in  tenebris  nati  sunt;  quia  paucissimi  ut  se  intra  metas  contineant,  verbo  Dei  se  praebent  dociles,  sed  potius  exsultant  in  sua  vanitate.  Sic  autem  habendum  est,  ut  nobis  affulgeat  vera  religio,  exordium  a  coelesti  doctrina  fieri  debere,  nec  quemquam  posse  vel  minimum  gustum  rectae  sanaeque  doctrinae  percipere,  nisi  qui  scripturae  fuerit  discipulus.  Unde  etiam  emergit  verae  intelligentiae  principium,  ubi  reverenter  amplectimur  quod  de  se  illic  testari  Deus  voluit.  Neque  enim  perfecta  solum,  vel  numeris  suis  completa  fides,  sed  omnis  recta  Dei  cognitio  ab  obedientia  nascitur.